Mnr. Wandile Sihlobo, hoofekonoom van Agbiz, het op die Africa Agri Tech-konferensie in Pretoria gesê hoewel daar heelwat data rondom die kommersiële landbou bestaan, is die gaping veel groter om sinvolle inligting rondom die ontwikkelende landbou in te samel. “Die kwessie is om hierdie produsente se inligting ook in te win om te bepaal wat hulle produseer en wat hul produktiwiteitsvlakke is. Dit is die enigste manier waarop programme geskep en beleid gevorm kan word om aan hierdie produsente die nodige dienste en produkte te verskaf.”
Sihlobo het gesê tegnologie en data loop hand aan hand. “Tegnologie help om dié inligting, wat nodig is vir beleidsvorming en beplanning, in te win. Wanneer dit gebeur, kan tegnologie waar nodig aangewend word vir praktiese oplossings.”
Hy het gesê dat dit nie net ’n Suid-Afrikaanse kwessie is nie, maar een wat die hele vasteland beïnvloed, waar bestaansboere die grootste groep produsente verteenwoordig. Daar is ’n hele aantal lande op die vasteland waar min inligting oor hierdie produsente bestaan.
“Tegnologie kan dan aangewend word om ’n verskil in produktiwiteit te maak en ek glo daar is heelwat geleentheid om die landbou só verder te ontwikkel. Boonop lê die antwoord nie net in die produksie van voedsel vir plaaslike gebruik nie, maar dit kan ook help om uitvoer te verhoog en om mededingend op wêreldmarkte te wees.”
Sihlobo het gesê die grootste probleem is om, ten spyte van gapings in die insameling van inligting, maniere te vind vir vennootskappe tussen regerings en die private sektor. “Wanneer dit gebeur, kan nywerheidsones byvoorbeeld opgerig word om verwerking verder in die waardeketting te stimuleer. Ons het ’n gefragmenteerde waardeketting wat kommersiële en kleiner boere aanbetref, maar deur die gebruik van tegnologie om die nodige inligting in te win, kan hierdie kwessie ook die hoof gebied word.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
