Byeboere is versoek om nie bye of heuning na die Suid-Kaap te bring ná die brande talle korwe vernietig het nie. Hierdie versoek is deel van die Suid-Kaap se poging om sy siektevrye status te behou.
Mnr. Alan Winde, Wes-Kaapse minister van ekonomiese geleenthede, sê die onlangse brande het honderde korwe vernietig en ook ’n groot gedeelte van die natuurlike voedingsbronne.
Luidens ’n mediaverklaring is die Suid-Kaap, spesifiek die Knysna-area, vry van jongbysiekte (vuilbroedsiekte) of American Foulbrood (AFB). “Mense probeer nou om die heuningby-bedryf te herbou deur bye of heuning van ander dele van die land, wat dalk uit AFB-besmette areas kom, te skenk. Ons vra dat mense nie heuningbye of heuning in die streek inbring nie.”
Byeboere skenk toerusting
Volgens mnr. André de Jager van die Suid-Kaapse Byeboervereniging, is dié versoek ’n voorsorgmaatreël om te verhoed dat siektes ingebring word. “Sommige byeboere skenk gebruikte toerusting vir produsente wie se korwe uitgebrand het,” sê hy. “Ná die brande is al die siektes vernietig, so hulle wil nie graag besmette toerusting inbring nie om die siektevrye status behou,” sê De Jager.
* Vir meer inligting kontak:
Mnr. Eddie Hart, woordvoerder van die Knysna Beekeepers Association: 082 573 1329 or eddiehart@telkomsa.net
Mnr. André de Jager, voorsitter van die South Cape Beekeepers Association: 082 922 6756 or andredjager@vodamail.co.za
