Volgens mnr. Diederik Samson, leier van die Nederlandse Arbeidsparty, is dit onnodig om vir skaliegas te boor in Nederland, Shell se land van oorsprong. Hy sê ook dat daar nie geboor sal word solank as wat sy party deel van ’n koalisieregering is nie.
Politieke partye, omgewingsorganisasies, gemeenskappe, waterrade en besighede, onder meer die Heineken-brouery, staan saam teen hidrobreking weens die risiko van besoedeling, luidens ‘n mediaverklaring van Afriforum. Nederlanders is versigtig vir beloftes oor die voordele en veiligheid van hidrobreking aangesien hulle vertroud is met die probleme, onder meer aardbewings, van konvensionele gasontginning in die Groningen-streek.
Dit blyk ook dat die rekening vir die oprigting van die nodige infrastruktuur om hidrobreking in Suid-Afrika te ondersteun, na die belastingbetaler sal gaan. Luidens Afriforum het mnr. Pravin Gordhan, minister van samewerkende regering en tradisionele sake, laat verlede jaar gesê sy departement is gereed om betrokke munisipaliteite by te staan om aan infrastruktuur-vereistes vir die proses te voldoen.
