Groot geleenthede bestaan vir landbou-ingenieurs in die Suid-Afrikaanse en internasionale verwerkingsbedrywe, sê kenners.
Prof. Linus Opara van die Universiteit van Stellenbosch meen landbou-ingenieurs kan ‘n sleutelrol in die gehalte van produkte speel.
“Daar is verwydering tussen produksie en markte, en daartussen gaan ‘n groot deel van produkte verlore, waarmee landbou-ingenieurs kan help,” sê Opara. Hy was een van die sprekers tydens die Suid-Afrikaanse Instituut vir Landbouingenieurs se jaarlikse konferensie in Pretoria.
Hoeveel gaan verlore?
Volgens ‘n studie waaraan Opara in Oman deelgeneem het, gaan ‘n groot deel van landbouprodukte verlore vanaf produksie tot by verbruikers. Op die plaas kan tot 21% van produkte na die oes verlore gaan. By supermarkte en kleinhandelaars van kruideniersware kan tussen 3% en 23% van produkte verlore gaan.
Opara meen landbou-ingenieurs het ‘n belangrike rol om te speel om die gehalte van produkte te meet en te sorg dat dit in die regte toestand by winkels en verbruikers uitkom.
“Landbou-ingenieurs het die nodige kennis en vaardighede om die sektor vanaf die plaashek tot by die winkelrak meer vaartbelyn te maak,” verduidelik hy.
Opkomende boere
Wat opkomende boere betref sê Opara kan landbou-ingenieurs ook ‘n groot rol speel om dié wat nie die nodige kennis het nie, by te staan.
“Dié wat nog nie die nodige blootstelling gehad het om na byvoorbeeld die verskillende kleure van hul vrugte te gebruik om te bepaal waar dit in die rypwordsiklus is nie, kan baie hierby baat. Veral omdat dié proses gaan bepaal hoe die produk na die mark vervoer moet word om te sorg dat dit in die gewenste toestand by ‘n winkel aankom,” vertel Opara.
29 September 2010
