Adj.pres. David Mabuza het onlangs die titelaktes van 776 ha grond aan 411 huishoudings van dié gemeenskap naby Natures Valley in die Wes-Kaap oorhandig.
Die oorhandigingseremonie is deur vele hooggeplaaste regeringsamptenare bygewoon.
Mnr. Cyril Constable, die voorsitter van die Covie-gemeenskapseiendomsvereniging, het op die oorhandiging gesê dat Covie eens ’n plek van oorvloed was. Volgens hom is die gemeenskap se grond tydens apartheid onder dwang by hul afgeneem. Daarby is visvangregte van die mense weggeneem, en die gemeenskap het in armoede verval.
Die grond is ook nooit in gebruik geneem nie, en dis vandag nog onderontwikkel.
Ontwikkeling
Mnr. Alan Winde, premier van die Wes-Kaap, het op die geleentheid gesê die herstel van die eiendomsreg van die grond speel ’n belangrike rol in die regstelling van die foute van die verlede en om waardigheid na gemeenskappe te bring.
“Wat my egter hartseer maak, is dat mense in baie gevalle kies om die geld pleks van die grond te neem vir vinnige bevrediging. Dit sal hartseer wees om die ‘Te Koop’ bordjies môre hier te sien hang.”
Hy sê mense wat hul grond terugkry, word ook meermale nie na behore bygestaan om mislukking te voorkom nie. Daarom is daar reeds sakevennote aangestel om seker te maak die gemeenskap kry die regte hulp en ondersteuning, “sodat die wol nie oor hulle oë getrek word nie”.
Me. Thoko Didiza, minister van landbou, grondhervorming en landelike hervorming, het beaam dat dit nie net belangrik is dat die grond oorhandig word nie, maar dat daar seker gemaak word dat die grond goed gebruik word.
“Ons gee julle ’n geboortesertifikaat met die titelaktes. Julle is nie meer loseerders nie, maar nou die eienaars.”
In sy toespraak het Mabuza gesê dat mense hul lewensbestaan en menswaardigheid terugkry danksy die oordag van die grond wat weens koloniale verowering en apartheid se segregasiebeleid van die mense weggeneem is.
Hy het ook gesê dit is ’n gebied met baie geleenthede vir die landbou en ekotoerisme, en het die gemeenskap ook gevra dat die grond doeltreffend gebruik moet word.
