Die boerderygemeenskap van die KwaZulu-Natalse Middelland treur oor die dood van mnr. Hedley James Brown (70) wat Maandagoggend op sy plaas Misty View by Lions River vermoor gevind is. Brown is die provinsie se eerste plaasmoordslagoffer van die nuwe jaar.
Kol. Thembeka Mbele, provinsiale woordvoerder van die SA Polisiediens, het gesê die plaaslike polisie het op 24 Januarie om 07:00 ’n oproep oor die voorval ontvang. “Die liggaam van ’n 70-jarige man het buite sy huis gelê het met beserings weens aanranding aan die gesig en twee steekwonde in sy rug. Drie vuurwapens en ’n skootrekenaar is gesteel. Die polisie op Howick ondersoek klagte van moord en roof.”
Mnr. Freddie van Tonder, veiligheidshoof van die KwaZulu-Natalse Landbou-unie, het aan Landbouweekblad gesê hy was Maandag op die moordtoneel.
Hy het gesê Brown was voorheen ’n voltydse beesvleis- en koolboer, maar ten tyde van sy dood was hy ’n deeltydse boer en ’n elektrisiën vir verskeie ander plase in die omgewing.
Brown se vrou, Judy, is sowat twee maande gelede aan kanker dood.
Van Tonder het gesê Brown is op Vrydagaand 21 Januarie laas lewend gesien deur ’n goeie vriend wat die boer weekliks besoek het.
Die The Witness-koerant berig dat werkers op die plaas agterdogtig geraak het toe hulle Maandagoggend by die werk aankom en Brown het nog nie sy erf se voorhek oopgesluit het soos sy gewoonte was nie. Die werkers het een van Brown se familielede gekontak wat na die plaas gekom, toegang tot die erf gekry en die boer se liggaam buite sy huis ontdek het.
“Brown se hande en voete was vasgebind en hy is erg op sy kop en gesig geslaan. Daar was blykbaar geen gedwonge toegang nie,” het Van Tonder gesê.
Van Tonder het boere in KwaZulu-Natal en elders daaraan herinner om altyd proaktief die potensiaal vir enige bedreigings te evalueer. Sulke bedreigings kan insluit probleme met bewoners, inwonende werkers, rondlopervee wat op die plaas kom, en onwettige jag met honde op die plaas.
“As ’n boer so ’n bedreiging identifiseer, moet die boer proaktief wees en dadelik die betrokke owerhede betrek om te help. Moenie probeer om die probleem op jou eie op te los nie.”
