Die land het genoeg geld in sy stelsels om die miljarde te hoes om grondhervorming moontlik te maak, sê prof. Mohammad Karaan, 'n lid van die Nasionale Beplanningkommissie.
Die Nasionale Ontwikkelingsplan beveel aan dat 20% van alle grond in landboudistrikte wat in wit hande is, herverdeel moet word.
Volgens mnr. Alan Winde, die Wes-Kaapse minister van landbou en ekonomiese geleenthede, behoort slegs 1,6% van die grond in die provinsie aan nuwe boere en 4% van die provinsie se landboubates word volgens die aandeleskema-stelsel deur nuwe boere besit.
Die provinsie het net meer as 11 miljoen ha wat besproeiingsgrond, droëland en veld uitmaak.
Volgens 'n sommetjie wat Karaan gemaak het, is R33 miljard nodig om 20% van die grond oor te dra. "Die vraag is waar gaan die geld gekry word?"
Finansiële modelle wat hy voorgestel het, is dat 50% van 'n staatsubsidie moet kom en die res moet deur 'n lening bekom word. Nog 'n moontlikheid kan wees dat die private sektor 50% bydra en die res kan van ontwikkelingsfinansiering bekom word. Die private sektor kan dit ook 100% befonds en nog 'n alternatief, hoewel die moontlikheid hiervan nog nie ontwikkel is nie, is die moontlikheid van 'n verband van die regering.
Hy het bygevoeg dat 'n werklikheid bestaan dat die meeste van die boere wat die land wil bemagtig, dalk nog nie bestaan nie. " 'n Ware boer word oor 'n lang tydperk geskep, nie diegene wat jy kry by die universiteit nie."
