Die African Farmers’ Association of South Africa (Afasa) rig hierdie versoek tot me. Thoko Didiza, minister van landbou, grondsake en landelike ontwikkeling, omdat die departement hom gereed kry om 529 014 ha grond aan swart opkomende boere uit te deel.Dié grond is die res van die 896 plase of 700 000 ha staatsgrond wat die staat vir grondhervorming beloof het.
Agri SA het ook reeds daarop gewys dat die private sektor en die georganiseerde landbou ’n waardevolle rol kan speel met die kies van begunstigdes en die ondersteuning van sodanige begunstigdes, en gewaarsku dat gewaak moet word teen korrupsie.
Afasa voel die georganiseerde landbou se oorsigrol sal probleme oplos wat die departement in die verlede ervaar het toe staatsamptenare die deur vir bedrog en korrupsie oopgelaat het, want niemand het die begunstigdes se belange verteenwoordig nie. Die organisasie sê hy sal binnekort die kwessie van oorsig en deursigtigheid met Didiza opper.
Afasa sê hy sien uit daarna dat die grond uitgedeel word aan boere wat reeds boer en die grond verdien. Dit sal die druk op kommunale grond verminder, terwyl die grondkwessie vir kleinskaalse boere aangepak word.
Mnr. David Mthombeni, voorsitter van Afasa in Mpumalanga, benadruk dat dit nie die verantwoordelikheid van die staat is om nuwe boere te skep nie. “Daar is genoeg boere in alle distrikte met grond as hul grootste honger.”
VERDELING VAN GROND
Afasa waarsku dat die ondersoekproses waar die departement wil vasstel hoe mense toegang gekry het tot staatsgrond sonder formele toestemming van die departement, nie misbruik moet word om die bedrog en korrupsie te wettig in die gevalle waar grond toegeken is aan vriende, familie en diegene wat nie boere is nie, maar omkoopgeld betaal het om die grond te kry nie.
Waar gevind word dat die grond onwettig of bedrieglike wyse beset is en deur korrupsie bekom is, moet die gereg sy volle gang gaan.
Mnr. Nakana Masika, sekretaris-generaal van Afasa, doen ’n beroep op opkomende boere om aansoek om die staatsgrond te doen sodat voedselsekerheid, werksekerheid en armoedeverligting verseker kan word.
KUNDIGE BOERE VIR TOEKOMS
TLU SA sê ’n verantwoordelike staat sal bestaande landbou-organisasies betrek by die evaluering, toekenning en daarstel van die kriteria waaraan nuwe toetreders moet voldoen.
Suid-Afrika se landbougrond word as marginaal beskou vergeleke met ander produserende lande, sê mnr. Henry Geldenhuys, president van TLU SA. Dit is daarom belangrik dat die beskikbare landbougrond met groot oorsig benut word. Dit is noodsaaklik dat die beginsel van skaalekonomie toegepas moet word.
“Ons het vir die toekoms kundige boere nodig wat hul plase winsgewend in produksie moet kan hou. Die ANC se rekord van grondoordrag het in sy eie erkenning skaars landbougrond op groot skaal uit produksie gehaal. Dit plaas voedselsekerheid in die weegskaal.”
TLU SA voel dat as die regte ekonomies gedrewe benadering nie die kern van grondbenutting is nie, is dit bloot ’n politieke punte-insameling pleks van ’n volhoubare oplossing vir die welstand en vooruitgang van die land.
