Semen van die ram NB180268 van die Nova Barletta Dormers van Clocolan in die Vrystaat is gebruik om vyf Dormerooie van mnre. Hendrik en J.D. Steyn van J.D. Steyn Dormers en Christo van der Merwe van Danarito Dormers, almal van Verkeerdevlei, te insemineer. Die Dormerskaapras se oorsprong is in Suid-Afrika.
“Net soos met die deurbraak van dr. Johan Steyn in die 1980’s toe hy laparoskopie na Suid-Afrika gebring het, het geslagsbepaalde semen die potensiaal om die kleinveebedryf te verander,” sê die maatskappy Ramsem.
Die Bloemfonteinse reproduksiespesialiste van Ramsem drs. Johan, Fanie en Thomas Steyn het met behulp van ST Genetics die eerste geslagsbepaalde saadsorteringslaboratorium in Suid-Afrika gevestig.
Die Dormerram is gekies vir sy hoë voeromsetting. Sy saad is danksy dié tegnologie verdeel in manlike (Y) en vroulike (X) spermselle.
Ramsem en nog ’n veeteeltmaatskappy, Absoulute Genetics, bied sedert April dienste aan Suid-Afrikaanse veeboere om geslagsbepaalde saad te koop of om hul eie teeldiere se saad te skei. Die diens kan gelewer word danksy beleggings van miljoene rande in ’n nuwe laboratorium en die diens word teen billike pryse aan die bedryf gebied. Klik hier om meer te lees oor die laboratorium.
Die vyf ooie wat geïnsemineer is, het elk van 5 tot 14 eerstegraadse embrio’s gelewer, waarvan 30 vroulik en 13 manlik was. Hierna is die embrio’s van die topskenkerooie gespoel en oorgeplaas in ontvangerooie. Die lammers van die embrio’s word teen September verwag, en daar heers groot opgewondenheid in die Dormergeledere, sê J.D. Steyn van J.D. Steyn Dormers.
“Hierdie tegnologie kan die teling en genetiese vooruitgang van diere voortaan drasties verander . Nie net baat stoettelers hierby nie maar die produksie van stoorlammers asook die produksie van vroulik diere as vervangingsdiere in kuddes kan nou bepaal word,” sê Steyn.
Danksy die gebruik van die tegnologie kan skaapboere nou beter beheer kry oor hoeveel ram- of ooilammers in die kudde gebore word. Die gebruik van die tegnologie hang ook van die boer se teeldoelwit af.
“Die voordeel van vroulike spermselle is dat ’n teler sy kudde vinniger kan vergroot deur meer vroulike nageslag te kry as wat normaalweg moontlik is. Die genetiese vordering is ook aansienlik vinniger aangesien dubbel die hoeveelheid vervangingsooitjies beskikbaar is vir seleksie.”
Met manlike semen kan ’n teler ramme teel van ooie wat voorheen goeie ramme geteel het.
