Die veediefstalvoorkomingseenhede van Odendaalrus en Stilfontein het 74 Merino-skape, onder meer 55 ooie en 15 lammers, ter waarde van R140 000 opgespoor nadat hulle die nag van 26 Februarie op Rykmansvlakte by Bothaville gesteel is.
Die skape is vermoedelik deur verdagtes na ’n kraal aangejaag waar hulle op ’n voertuig gelaai en weggeneem is. Danksy die boeregemeenskap is die voertuig geïdentifiseer en kon die skape opgespoor word.
Me. Isabel Kruger, voorsitter van die Vrystaatse Rooivleis¬produsente-organisasie se veediefstalvoorkomingsforum, sê dit is danksy die polisie se vinnige optrede dat die skape opgespoor is.
Sy versoek vee-eienaars om voornemende werkers se werkrekords noukeurig na te gaan en veediefstal so vinnig as moontlik by die polisie aan te meld.
Dr. Jane Buys, veiligheidsrisiko-ontleder by Vrystaat Landbou, sê Bothaville loop die afgelope maande erg onder veediefstal deur.
GESTEELDE BOKKE
Danksy ’n operasie deur die Amajuba-veediefstalvoorkomingseenheid in Amajuba verlede week is 27 van 30 gesteelde bokke weer teruggevind.
Vier van die bokke is in ’n verlate rondawel op Ballangiech gevind. Daar is verder gesoek en afgekom op ’n groep mans wat oor bokke waggehou het. Toe die mans die polisie gewaar het, het hulle gevlug. Die polisie het op 23 bokke beslag gelê.
Al die bokke is na die Dannhauser- munisipale skut geneem waar hul eienaars hulle nog moet uitken. Die eenheid versoek vee-eienaars by wie bokke gesteel is om sers. Lephoto by 079 500 0718 te kontak.
