Dit wil voorkom asof daar baie min gifreserwes oor is om sprinkane te bekamp, sê me. Andrea Campher, risiko-en-rampbestuurder van Agri SA.
“Volgens ons bronne is die laaste reserwes van die 600 000 liter gif wat in Desember afgelaai is, nou amper op. Ons moedig alle distriksprinkaanbeamptes aan om dringend kontak te maak met die department van landbou of die georganiseerde landbou sodat ons kan bepaal waar daar nog gif oor is om te verseker dat dit so doeltreffend moontlik aangewend kan word.”
Daar is steeds ’n ontploffing van sprinkaanuitbrekings. Veral dele van die Oos-Kaap, Wes-Kaap en Noord-Kaap loop deur.
Volgens mnr. Willem Symington, voorsitter van Agri SA se afdeling vir natuurlike hulpbronne, is daar in sekere distrikte verskeie swerms wat sowat 1 000 ha of groter is.
“Die hele suidoostelike deel van die Noord-Kaap is tans ’n groot probleem, veral plekke soos Prieska, Britstown en De Aar. In die Oos-Kaap is daar groot swerms by plekke soos Aberdeen, Willowmore, Fullarton, Steytlerville en Middelburg, en in die Wes-Kaap by plekke soos Murraysburg, Beaufort-Wes en Merweville.”
Campher sê hoewel ’n vervaardiger in Pretoria die gif verskaf, moet van die bestanddele van Japan kom.
“Ons weet daar is bestellings geplaas, maar is nog nie seker wanneer die nuwe besending sal aankom nie. Dis ook nie duidelik of die department al agterstallige betalings aan distriksprinkaanbeamptes gemaak het nie.
Intussen het die Wes-Kaapse departement van landbou R5 miljoen beskikbaar gestel vir die aankoop van beskermende kleredrag, toerusting en lugsteun om die swerms te bekamp. Volgens die departement plaas swerms in die Sentraal- en Klein-Karoo druk op vrugte- en wynprodusente by Calitzdorp, Ladismith, Oudtshoorn, Swellendam en Barrydale.
“Nasionale wetgewing bepaal dat die bestuur van migrerende plae ’n nasionale mandaat is,” lui ’n verklaring deur die departement. “Nasionale wetgewing skets ook die noodsaaklike rol wat provinsies moet speel in steun en bemagtiging om ’n ramp te vermy.”
Dr. Ivan Meyer, Wes-Kaapse minister van landbou, het me. Thoko Didiza, minister van landbou, grondhervorming en landelike ontwikkeling, versoek om verdere steun vir die bekamping van die sprinkaanswerms te bied.
