Ekonomiese groei van 5% en 5,1% onderskeidelik, word in 2011 en 2012 in Afrika verwag, sê die Verenigde Nasies (VN).
Luidens ‘n berig op Engineering News meen die VN die toename in infrastruktuurbelegging, groeiende landbouproduksie en ‘n groeiende vraag na uitvoere uit Afrika gaan tot dié groeisyfers bydra.
Volgens die VN se wêreldekonomie-situasie en -vooruitsigverslag, wat Dinsdag (18 Januarie 2011) vrygestel is, het die kontinent se ekonomie in 2010 met 4,7% gegroei - ten spyte van ‘n swak groeisyfer van 2,3% in 2009.
“Verhoogde regeringspandering -besteding op infrastruktuur, sterk prestasie van die landbousektor en die invloei van nuwe buitelandse beleggings in verskeie bedrywe het sterker groei in plaaslike vraag gestimuleer”, aldus die verslag.
Nie sterk genoeg vir armoede-uitwissing
Ten spyte van die groeivooruitsigte, meen die organisasie die kontinent se ekonomiese groei is nie sterk genoeg om sy teikens vir vermindering van armoede te bereik nie.
“Blywende hoë vlakke van werkloosheid... asook wyd-verspreide wanvoeding sal van die kommerwekkende kwessies van vooruitsigte bly”.
Ethiopië, Egipte, Uganda, Tanzanië, Rwanda en Zambië is van die lande waar snelgroeiende ekonomieë verwag word, veral oor die groei in hulle vervaardiging- en dienssektore, asook die toename in landbouproduksie en infrastruktuurbeleggings.
In Nigerië, Algerië en die Republiek van Chad word egter swak ekonomiese vooruitgang verwag.
Bron: Engineering News
20 Januarie 2011
