Terwyl boere in Noordwes erge droogte ervaar het, het boere in gedeeltes van Mpumalanga en Limpopo die afgelope seisoen goeie reën gehad.
Mnr. Joachim Prinsloo, ’n boer van Kiepersol en wenner van Mpumalanga se Toyota Jongboer van die Jaar-titel, sê hulle seisoen was doodnormaal. “Die reën was soos gewoonlik tussen 30 en 40 mm per week met genoeg sonskyn tussen-in. Ons is baie gelukkig.”
Hy sê heelwat boere in die omgewing het nie hul pompe aangeskakel nie, omdat dit so goed gereën het.
Eerder te veel as te min
Die noordelike gedeeltes van Limpopo het die afgelope week ámper te veel reën gehad. “Op die oomblik skyn die son, waarvoor ons dankbaar is, want ons kan nie in die boorde kom om te begin spuit as dit aanhou reën nie,” sê mnr. Piet Muller van Amana Boerdery in die Levubu-omgewing. “Maar as jy ’n droogte deurgemaak het, sal jy nooit weer oor reën kla nie.” Hulle boer hoofsaaklik met avokadopere, neute en koejawels.
Hulle het gedurende die afgelope week 61 mm reën gehad en 446 mm vanaf 1 Januarie. “Die reënval verskil van jaar tot jaar, maar ons kry gewoonlik baie reën in Januarie. Die damme is vol en ons het water vir die res van die jaar.”
Verandering in weerpatrone
“Nat skade is goedkoper as droë skade,” sê mnr. Giepie Joubert van die Marulha Landgoed by Hectorspruit in Mpumalanga. “Ons het in Desember soveel reën gehad dat ons glad nie besproei het nie.” Hulle boer met suikerriet, piesangs, mango’s en pynappels.
Die area se gemiddelde reënval is 1000 mm per jaar en hulle het die afgelope twee weke 200 mm gehad. “Ons kan nie daaroor kla nie, maar die weerpatrone het baie verander. Die temperature in Desember was so agt na tien grade laer as gewoonlik en dit het ’n probleem veroorsaak met sekere vrugte-variëteite wat nie ontkiem het nie.”
