Graan SA vra dat ‘n deel van die Sasol-boete vir onmededingende kunsmispryse na benadeelde boere moet gaan, nadat ‘n deel van die Pioneer Foods-boete pas aan “benadeeldes” toegewys is.
Mnr. Neels Ferreira, voorsitter van Graan SA, het kommentaar gelewer nadat die Mededingingskommissie die bepalings van ‘n skikking met Pioneer Foods, uiteengesit het. Hierdie skikking is die gevolg van onmededingende praktyke in die bak- en maalbedrywe.
Ferreira sê dié organisasie is steeds teleurgesteld dat hierdie tipe van onmededingende praktyke plaasgevind het, maar is verheug dat die hele proses besig is om tot ‘n einde te kom en hoop dat algemene vertroue, veral onder verbruikers van graanprodukte, nou herstel kan word,” sê mnr. Neels Ferreira, voorsitter van Graan SA.
Diè skikking impliseer dat onder andere ‘n boete van R250 miljoen aan die staat betaal word en dat ‘n verdere R250 miljoen in ‘n fonds wat deur die Nywerheidsontwikkelingskorporasie (IDC) geadministreer sal word, gestort word. Hierdie geld sal aangewend word vir die verbetering van mededinging.
Aangenaam verras
Volgens Ferreira is Graan SA aangenaam verras oor die beginsel wat nou gevestig is dat ‘n deel van die boete vir die ontwikkeling van meer mededinging in die agro-prosesseringindustrie aangewend kan word en glo dat hierdie beleidsriglyn, dat geld op hierdie manier na “benadeeldes” kan terugvloei, gevestig moet word.
Om hierdie rede sal Graan SA weer met die Mededingingskommissie in gesprek tree oor die skikking wat met Sasol oor ‘n soortgelyke oortreding van die Mededingingswet bereik is, ten einde ook fondse tot voordeel van “benadeeldes” in die kunsmisbedryf aan te wend.
Graan SA het in die verlede die versoek aangeroer, maar dit is in daardie stadium afgewys. Daar is meriete om boetes as gevolg van onmededingende praktyke tot voordeel van “benadeeldes”, waaronder graanprodusente, te gebruik. Graan SA sou wou sien dat so 'n bydrae aangewend word om mededingendheid ten opsigte van tegnologie te bevorder.
Inligting versamel
Ten opsigte van die Mededingingskommissie se uitspraak dat die beskikbaarstelling van saamgevoegde inligting mededingers in staat stel om saam te span, meen Graan SA dat diè sekondêre bedryfsinligting nodig is vir die doeltreffende werking van die totale bedryf. “Daar behoort dus meganismes in plek gesit te word om hierdie inligting onafhanklik te versamel, te verwerk en beskikbaar te stel,” sê mnr. Ferreira.
In hierdie verband is Graan SA ook bewus van, en ondersteun ‘n poging deur die Nasionale Landbou Bemarkingsraad om die Mededingingskommissie te oortuig om wel ‘n meganisme, waarvolgens hierdie inligting beskikbaar kan kom, binne die bepalings van die Wet op Mededinging te akkommodeer.
4 November 2010
