Mnr. Jozua du Plessis van die plaas Middelbult by Delmas is vanjaar Graan Suid-Afrika/Syngenta se Graanprodusent van die Jaar. Hy het dié gesogte toekenning op ‘n onthaal in Kyalami, Gauteng, ontvang waar GSA sy jaarlikse toekennings aangebied het.
Die wenner het die toekenning van mnr. Antonie Delport, besturende direkteur van Syngenta Suid-Afrika, en mnr. Jaco Minnaar, voorsitter van GSA, ontvang.
Du Plessis en sy vrou, Sonja, en twee van hul seuns, Jozua junior en Chandré, boer met Bt-vrye mielies, sojabone, sojaboonsaad, koring, aartappels en Bonsmara-beeste onder besproeiing en droëland. Hul ander seun, Ruan, het sy eie besigheid.
Al die boere in SADu Plessis het gesê weens die al die probleme, soos die droogte en ekonomiese toestand, moet ál die boere van Suid-Afrika eintlik saam met hom op die verhoog staan, “want Suid-Afrika se boere is die beste in die wêreld om al dié aanslae te weerstaan”.
Delport het gesê slegs buitengewone mense kan vandag in die landbou staande bly en vooruit boer. Daar is baie uitdagings, maar ook baie geleenthede weens die stygende vraag na voedsel. “Ons staan midde-in die perfekte storm weens klimaatsverandering, groot risiko’s, beperkte waterbronne en onstabiele politieke omstandighede,” het hy gesê en bygevoeg dat dit boere dwing om oplossings te soek. Hulle moet slim boer.
Al lyk 1% vooruitgang op ‘n keer min, maak dit mettertyd groot vordering moontlik. Moenie twee keer dieselfde foute maak nie, maar ook nie twee keer ‘n geleentheid mis nie. Maak die gaping tussen goed en uitstekend kleiner. “Ons staan voor buitengewone uitdagings, maar gelukkig het ons buitengewone boere,” het hy gesê.
Byskrif: Mnr. Jozua du Plessis (naaslinks) wat as Graanprodusent van die Jaar bekroon is, is hier saam met, van links, mnre. Jannie de Villiers, uitvoerende hoofbestuurder van Graan SA, Antonie Delport, besturende direkteur van Syngenta Suid-Afrika, en Jaco Minnaar, voorsitter van GSA. (Foto: Charl van Rooyen)
