Die Mededingingskommissie en sewe maatskappye betrokke by die graanhandelsaak verskyn Woensdag (9 November 2011) voor die Mededingingstribunaal.
Luidens ’n verklaring sal die tribunaal dan gevra word om die ooreenkomste wat die kommissie en die maatskappye bereik het, goed te keur en te bevestig.
Dít vorm deel van die ondersoek na 17 maatskappye wat glo betrokke was by prysvastelling met die opberging van en handel in graan. Die kommissie se ondersoek na dié saak het op 17 Maart 2009 begin.
Die ooreenkoms
Die ooreenkoms bepaal dat GWK Bpk., NTK Limpopo Agric Bpk., NWK, OVK Operations Bpk., Senwes Bpk., Vrystaat Kooperasie Bpk. en die Graan Silobedryf (Edms.) Bpk. onderneem om met die kommissie saam te werk.
Verder onderneem hulle om hulle te weerhou van enige oortreding van die Mededingingswet, veral ten opsigte van prysvasstelling. Die maatskappye gaan ook programme ontwikkel en instel om te verseker hulle voldoen aan die wetgewing.
Die maatskappye het ook ingestem om elk ’n boete te betaal. Dié boetes verteenwoordig 4% van elkeen se omset vir die 2009-boekjaar.
Die grootste boete van R7 628 670,36 is aan Senwes opgelê. NWK en Vrystaat Koöperasie moet onderskeidelik R3 295 158, 08 en R1 286 969, 22 betaal. Die ander boetes wissel tussen sowat R300 000 en R100 000 elk.
Die tribunaal kan die boetes bekragtig, verwerp of vra dat aanpassings gemaak moet word. Agt ooreenkomste in verband met dié saak is reeds afgehandel, met boetes van altesaam meer as R22 miljoen.
8 November 2011
