Mnr. Albertus van Schalkwyk, voorsitter van die Jagersfontein-boerevereniging, sê opruimingswerk gaan onverpoos voort. “Terwyl daar ’n ondersoek voortduur om te bepaal wie vir die ramp verantwoordelik was, is die myn steeds besig met opruimingswerk. Die dorp is meestal skoongemaak met die myn wat ook verseker het dat ongesuiwerde riool nie in die plaaslike spruit beland nie, maar weens die ondersoek is nog nie begin met herstelwerk op die mynterrein self nie.”
Van Schalkwyk sê dat dit op die omliggende plase wat deur die ramp beïnvloed is, beter gaan. “Ons het goeie reën die afgelope seisoen gehad, wat die keerwalle op die plase skoongespoel het. Produsente kan dus weer besproei soos nodig nadat toetse bewys het dat daar geen toksiese middels in die water is nie.”
Die Wolwasdam is nog ’n probleem, sê Van Schalkwyk, weens swaar metale wat daarin agtergebly het.
