Prof. Mohammad Karaan is die groot taak opgelê om die Groenskrif oor grondbeleid aan te pas en te verbeter.
Die Regering wil in die Groenskrif onder meer hê dat regulerende beperking opgestel moet word om die beste landbougrond in die land te beskerm. Dié beperkings kan op Suid-Afrikaners wat dit besit, opgelê word.
Die besprekingsdokument oor die Groenskrif van die Departement van Landelike Ontwikkeling en Grondhervorming wat uitgelek is, het al heelwat kritiek ontlok dat dit nie veel detail gee van hoe kwessies wat daarin bespreek word, gehanteer gaan word nie.
(Kyk hier na die Groenskrif.)
Karaan is lid van die Nasionale Beplanningskommissie wat ’n visie vir die land moet ontwikkel. Hy is ook dekaan is van die fakulteit landbouwetenskappe aan die Universiteit Stellenbosch.
Hy het nou begin kyk wat gedoen kan word om die dokument so aan te pas dat dit werkbaar is en nie belanghebbendes sal polariseer nie.
Karaan het aan Landbouweekblad gesê dat die dokument ’n paar goeie beginsels het, maar dat die probleem die praktiese uitvoering daarvan is. Hy is vol vertroue dat die dokument reggemaak kan word, maar dat dit tog ’n moeilike taak is.
Dit kan tot ses maande duur, want daar sal wyd met belanghebbendes gepraat moet word.
Omdat die dokument nog nie deur die Kabinet aanvaar en dit nog nie openbaar gemaak is nie, bly dit ’n uitgelekte dokument waarop mense nie amptelik kommentaar kan lewer nie. Karaan wil ander belanghebbendes in onder meer die landbousektor betrek om werkbare opsies op die tafel te plaas.
Dit sal saam met die Departement van Landelike Ontwikkeling en Grondhervorming gedoen word.
Lees meer in Landbouweekblad se uitgawe van 10 Desember 2010.
6 Desember 2010
