“Ons moet ophou om te oorreageer as ‘n dokument soos die Groenskrif vir grondhervorming voorgestel en saamgestel word,” sê prof. Piet Croukamp, ‘n politieke kenner van die Universiteit van Johannesburg.
Hy het Donderdag (7 Oktober) afgevaardigdes by Agri SA se jaarkongres op Muldersdrif toegespreek.
Volgens Croukamp gaan die beleid die mees uitermatige voorstelle van die ANC oor grondhervorming bevat, aangesien die party weet onderhandelinge gaan volg waarna die dokument aangepas sal word.
“Ons is deel van ‘n politieke kultuur van onderhandeling. Dit beteken, die voorstel wat ter tafel gelê gaan word en dit wat op die ou end geïmplementeer gaan word, gaan baie verskil.”
Grondhervorming vir ses jaar gevries
Intussen sê mnr. Theo de Jager, ondervoorsitter van Agri SA, geen nuwe plan rondom grondhervorming sal geslaagd wees “as ons nie die vingerpunte het wat die plantwerk kan doen nie, as daar nie vaardige amptenare is wat die proses met dissipline en toegewydheid kan implementeer nie.”
De Jager sê sedert 1994 is 19 projekte en/of prosesse reeds bespreek en/of geïmplementeer om grondhervorming suksesvol te probeer maak. Hy sê om die verval wat die afgelope 16 jaar op reeds oorhandigde plase plaasgevind het, te herstel, gaan die staat meer kos as wat dit oorspronklik gekos het om die grond te koop.
Volgens De Jager word verwag dat die Groenskrif meer staatsinmenging in die landbousektor tot gevolg gaan hê, en dat dit na ander sektore kan uitbrei. Hy het afgevaardigdes gewaarsku dat dit nie aangenaam gaan wees om die dokument te sien nie, maar dat ‘n tyd van groot stryd om dit te verander voorlê.
8 Oktober 2010
