Só sê prof. Ben Cousins, stigter van die program vir grond- en landbou-studies (Plaas) by die Universiteit van Wes-Kaapland.
Cousins het in ’n debat oor grondhervorming in Johannesburg gesê daar is talle voorbeelde op die res van die vasteland wat toon dat kleinskaalse boerderye inderdaad volhoubaar en suksesvol kan wees en vir talle mense kos kan produseer. ’n Beter begrip vir kleinskaalse landbou is nodig.
Hy sê daar is geen gronde vir mnr. Gugile Nkwinti, Minister van Landelike Ontwikkeling en Grondhervorming, se stelling dat 90% van plase wat oorgedra is, nie meer produktief is nie. Cousins was een van drie sprekers wat gepraat het oor hoe grond wat oorgedra is, weer produktief gemaak kan word.
Ander redes speel ook 'n rol
Die geleentheid was die bekendstelling van die Vumelana-adviesdiens wat op die been gebring is om bevoordeeldes van grondhervorming en voornemende beleggers by mekaar uit te bring.
Hy sê ander redes vir mislukkings met grondhervorming is ’n gebrek aan politieke wilskrag, gebrekkige beleid, swak projekbeplanning en ’n gebrek aan steun vir boere ná vestiging.
Dr. Vuyo Mahlati, ’n lid van die Nasionale Beplanningskommissie, het gesê net een uit 200 begunstigdes van grondhervorming het toegang tot ondersteuning nadat die grond oorgedra is. Sy glo grondhervorming moet op ’n distriksvlak uitgevoer word.
Mnr. Golden Mahove, hoofbestuurder van die Vemelana-adviesdiens, het gesê daar is soms baie onmin onder begunstigdes. Hy meen eienaarskap van die grond en bestuur van die boerdery moet geskei word.
