’n Vergadering om die heropening van die grondeise-proses, vir nuwe eis-aansoeke, te bespreek, vind Dinsdag, 23 Oktober, in Pretoria plaas.
Die Nasionale Grondeise-forum sê die vergadering volg op ’n versoek wat sowat ’n jaar gelede aan mnr. Gugile Nkwinti, Minister van Landelike Ontwikkeling en Grondhervorming, gerig is.
Mnr. Mosupye Tshwene, voorsitter, sê luidens ’n verklaring op News24.com, beëdigde verklarings met die versoek is meer as ’n jaar gelede op die departement beteken. Die organisasie wil hê die proses moet heropen word vir dié persone wat die vorige sperdatum van 1998 gemis het.
Dr. Theo de Jager, ondervoorsitter van Agri SA, sê hy het dié kwessie onlangs met Nkwinti bespreek om die kommer daaroor met hom te bespreek. Hy sê Nkwinti het aan hom aangedui dat hulle die moontlikheid ondersoek om die aansoek proses in die middel van 2013 te open, ter herdenking van die instelling van 1913 se Naturellewet.
Boere wag jare lank vir betaling
“Hierdie is een van ons grootste nagmerries denkbaar, want as jy kyk na die vorige proses is sowat 5% van die eise afgehandel terwyl van die ander wat in die Staatskoerant gepubliseer is, al vir 10 jaar in die vrieskas lê. Dit beteken daardie boere kan nie met hulle werksaamhede op die plaas voortgaan nie, terwyl hulle jare wag vir die staat om hulle vir hulle grond te betaal,” vertel De Jager.
Sommige boere soebat nou dat hulle grond gekoop word, terwyl ander tot 50% minder vir hulle plase aanvaar net om geld uit die departement te kry.
Wat die vergadering betref, sê De Jager hulle is nie genooi na of in kennis gestel van so ’n vergadering nie. Die vergadering sal volgens Tshwene deur die adjunkkommissaris vir grondeise bygewoon word. Dit sal inAtteridgeville se gemeenskapsaal plaasvind.
Bron: News24.com
