'n Opdrag om die nuwe grondeiseproses verder as 2019 te verleng, kan waarskynlik van mnr. Gugile Nkwinti, Minister van Landelike Ontwikkeling en Grondhervorming, af kom.
Die Grondwethof het die Parlement altesaam 24 maande gegee om behoorlike openbare verhore rakende die gewysigde Wet op die Herstel van Grondregte (Wet 15 van 2014) te hou en die wetgewing in die tussentyd as ongeldig verklaar.
Hoewel die hof met die ongeldigverklaring die nuwe grondeiseproses gestaak het, het hy nie eise wat sedert die heropeningsproses in 2014 ingedien is, ongeldig verklaar nie.
Nkwinti sê hulle sal kyk na die impak wat die opskorting van die nuwe eiseproses op die indiening van eise het en besluit of dit sin maak om die nuwe eiseproses te verleng, wat 2019 ten einde moes loop.
“Indien die Parlement lank neem, twaalf maande, dan sal ons dit moet oorweeg om die eiseproses met daardie tyd te verleng om in te haal,” het Nkwinti gesê.
Voordat die heropening van grondeise ’n werklikheid geword het, het ekonome aangedui dat die koste vir die geskatte 397 000 grondeise van R129 miljard tot R179 miljard kan kos indien die eise binne 15 jaar afgehandel word.
