Mnr. George Nicholas is onlangs op die indrukwekkende ouderdom van 104 vreedsaam oorlede. Hy het sy laaste jare in Oos-Londen in die Oos-Kaap gewoon.
Oom George, soos hy onder geslagte van landboujoernaliste en boere bekend geword het, is op 29 Mei 1918 in Pretoria, Gauteng, gebore, slegs ’n paar maande voor die einde van die Eerste Wêreldoorlog.
Omstandighede het daartoe gelei dat hy vir die grootste deel van sy kinderjare in die Tempe-kinderhuis in Bloemfontein in die Vrystaat grootgeword het. Ten spyte van die swaarkry wat hy tydens sy jong lewe ervaar het, het oom George tot volwassenheid gegradueer met die positiwiteit, energie en toewyding waarvoor hy bekend geword het en wat hy vir die res van sy lang lewe behou het.
Sy eerste werk in die Suid-Afrikaanse media was as junior klerk in die advertensie-afdeling van die Vrystaatse koerant The Friend. Nadat hy in die Tweede Wêreldoorlog militêre diens verrig het, het hy ’n junior verslaggewer by dieselfde publikasie geword en binne ses maande geleer hoe om 120 woorde per minuut in snelskrif te skryf.
In 1956 het hy en sy gesin na Salisbury in Rhodesië (nou Harare, Zimbabwe) verhuis en waar hy die landbouredakteur van die Rhodesia Herald geword het. Hy het terselfdertyd angeliere met hidroponika gekweek en artikels vir die tydskrif Farmer’s Weekly in Suid-Afrika geskryf.
In 1973 het hy by die Rhodesia Herald bedank en saam met sy gesin na Suid-Afrika teruggekeer om heeltyds vir Farmer's Weekly te werk. Hy is later aangestel as streekredakteur, gesetel in Pretoria.
Oom George het op 70-jarige ouderdom amptelik by Farmer's Weekly afgetree, vir homself sy eerste rekenaar ooit gekoop en begin vryskutartikels skryf totdat hy in sy vroeë 90’s was. Sy verbintenis met Farmer’s Weekly het tot 2016 geduur.
In 2017 het Farmer’s Weekly ’n lewenslange prestasie-toekenning aan oom George oorhandig as dank vir sy 72 jaar diens aan die landboujoernalistiek en breër boerderysektor. In 2018 het die publikasie ’n eeufeesverjaarsdagviering vir sy veteraan-staatmaker gehou.
Me. Denene Erasmus, destyds hoofredakteur van Farmer's Weekly, het geskryf, “Waarheen Farmer’s Weekly se joernaliste ook al reis, lyk dit of daar altyd iemand is wat George nog onthou. Die waardering wat die landbougemeenskap het vir die bydrae wat hy tot die sektor gelewer het, kan nie oorskat word nie.”
Oom George, wat getroud was met wyle Cynthia en daarna wyle Constance, laat sy dogter, Verity, seun, Neville, en kleinseun, Warren, agter.
