Die Ken Forrester-wynhandelsmerk is gerat om nuwe markte in Europa en Asië te oorrompel nadat AdVini, ’n invloedryke Franse wynverspreidingsmaatskappy, ’n beduidende aandeel in dié bekende Suid-Afrikaanse handelsmerk bekom het.
AdVini is op die Paryse aandelebeurs genoteer en het ook onlangs die Stellenbosse wynplaas Le Bonheur gekoop. Die maatskappy besit ook die Stellenbosse plaas L’Avenir en het dié handelsmerk aansienlik uitgebrei sedert hulle beheer daarvan oorgeneem het. Buiten die Suid-Afrikaanse plase, sluit Advini se portefeulje ook wyneiendomme in Frankryk en Chili in.
Mnr. Ken Forrester, wat sal aanbly as hoof uitvoerende beampte van Forrester Vineyards, sê AdVini het slegs die handelsmerk gekoop. Die plaas by in Forrester se besit. Forrester Vineyards is geleë op een van die oudste plase in die Stellenboschomgewing. Dis 40 ha groot, waarvan bykans 36 ha onder wingerd staan. Die totale wynproduksie is tans 80 000 kiste wyn (12 bottels per kis).
“Ons glo die besigheid kan oor die volgende vyf jaar met tot 50% groei danksy die ooreenkoms,” het hy gesê. “Die AdVini Groep het groot internasionale markervaring wat ondersteun word deur meer as 100 ervare verkoopsagente regoor die wêreld.” Volgens Forrester is dit veral die maatskappy se voetspoor in Europa en Asië wat die handelsmerk tot voordeel gaan strek.
Forrester, wat oorspronklik in die hotel en restaurantbedryf gewerk het, het die plaas in 1993 gekoop. Die eerste wyn is die jaar daarna geproduseer en sedertdien het Forrester Vineyards veral bekend geraak om sy Chenin blanc.
