Hoenderinvoer wat die Suid-Afrikaanse mark binnegekom het, het die afgelope drie maande sowat 15 000 ton per maand beloop en die plaaslike bedryf is bekommerd oor die invloed wat dit op plaaslike pryse het.
Mnr. Phil Tozer, verkope- en bemarkingskonsultant van Astral Foods, sê invoer het binne ’n kwessie van maande van 5 000 ton tot 10 000 ton per maand tot 15 000 ton per maand gestyg.
Mnr. Chris Schutte, hoof uitvoerende beampte van Astral Foods, beskryf dié invoer as “onverantwoordelik”. Hy sê dit dwing sake-ondernemings op hul knieë, wat werksgeleenthede benadeel.
Brasilië
Een faktor wat ’n groot invloed op Suid-Afrika se mark het, is dat ’n groot hoeveelheid invoer vanaf Brasilië die plaaslike mark oorstroom. Schutte sê dié invoer druk veral plaaslike pryse af omdat die Brasiliane op ander hoendersnitte fokus.
Die Brasilaanse mark spits hom grotendeels op die Amerikaanse vraag na hoenderborsies toe, en derhalwe word hoenders aangehou wat geneties geneig is om groter borsies te produseer. Die res van die hoenderporsies word daar nie as sogenaamde prima-snitte gesien nie en word teen laer pryse na ander markte uitgevoer.
Die Suid-Afrikaanse verbruiker soek weer ’n groter dy en been, derhalwe fokus boere hier op hoenders wat geneties groter bene en dye lewer. Schutte sê die storting van Brasilië se kleiner, maar goedkoper bene en dye op die plaaslike mark, druk pryse vir “prima-snitte” in Suid-Afrika af, wat die voortbestaan van die bedryf bedreig.
“Die prys van hoender is volgens die voedselinflasie-indeks die afgelope vier jaar plat. Sonder die lae inflasie op hoender, sou die land se voedselinflasie veel hoër gewees het,” verduidelik Schutte.
Subsidies
Die subsidies wat oorsese boere ontvang, veroorsaak verdere uitdagings vir die plaaslike bedryf. Schutte sê boere in ander lande kan van eiers ontslae raak as die plaaslike mark oorstroom is. “Hul regerings gee vir hulle subsidies om dit te doen.”
Die Suid-Afrikaanse boer ontvang geen subsidie van die staat nie, en kan nie bekostig om eiers te vernietig nie. “Dit beteken dat jy soms enige prys moet aanvaar vir hoendervleis van ’n goeie gehalte op ’n oorvol mark, terwyl jou produksiekoste presies dieselfde gebly het,” verduidelik Schutte.
Voer
Intussen word die pryse van voer ook ’n ál groter uitdaging vir die bedryf, want hoenders moet weens die invoer langer aangehou word vir ’n beter prys. Schutte sê sowat 70% van die koste om ’n volgroeide hoender van 1,8kg te produseer, is vir voer.
Astral Foods het ter enige tyd 30 miljoen hoenders en kuikens op sy aanlegte en plase. ’n Volgroeide hoender word gewoonlik op die ouderdom van 34 dae geslag, maar swakker pryse en ’n oorspoelde plaaslike mark lei dikwels daartoe dat die hoenders langer aangehou moet word.
Vir elke ekstra dag wat ’n besending hoenders aangehou moet word, moet sowat 8 000 ton voer aangekoop word, wat die maatskappy se uitgawes per dag met 2,8% opstoot.
