Verskeie projekte om die watersekuriteit in die land te bevorder, is deur me. Nomvula Mokonyane, Minister vir Water en Sanitasie, aangekondig.
Die Vaal Gamagara-waterprojek in die Noord-Kaap het reeds afgeskop met die lê van ’n 432 km-pyplyn. By die eerste fase van die projek is die fokus daarop om ’n 82 km-pyplyn vanaf Roscoe in Kathu na Black Rock te ontwikkel. Dit sal die mynbousektor, veeboerderye, sonkragparke en die gemeenskappe van Kathu, Olifantshoek en Hotazel bedien. Die verwagting is dat hierdie fase teen Augustus 2018 afgehandel sal wees.
Die aanvang van heelwat watertoevoegingskemas is ook vir die huidige geldjaar beplan. Die bou van die Clanwilliamdamwal, wat reeds maande stilstaan, is ook op die kaarte. Dié damwal sal die bergingsvermoë van die dam verhoog om water aan opkomende swart boere te verskaf en om die ekonomiese potensiaal van die gebied te ontsluit, het Mokonyane gesê.
Toevoer en toegang verbeter
Werk om die damwal van die Tzaneendam in Limpopo te verhoog, sal ook in Julie vanjaar begin. Die grootmaatwaterskema vir die laer Thukela in Kwazulu-Natal sal na verwagting in Desember voltooi wees.
Hierdie skema sal bykomende water verskaf aan die kus- en binnelandse gebiede van die KwaDukuza- en die Mandeni-munisipale gebiede. Die Mogalakwena-grootmaatwatertoevoer in Limpopo sal sien dat 94 000 mense, asook myne, in die Waterberg-gebied, water ontvang. Die Namakwa-grootmaatwaterskema in die Noord-Kaap sal water aan 11 500 huishoudings verskaf.
In Mpumalanga is die eerste twee fases van die Hoxane-watersuiweringswerke voltooi. Die derde fase sal sien dat ’n bykomende 27 miljoen liter gesuiwerde water per dag aan swart opkomende boere beskikbaar is. Die eerste been van die Mokolo Krokodilrivier (Wes)-wateroordragskema se tweede fase, waar ’n 160 km-pyplyn gelê word om water vanaf die Krokodilrivier (Wes) naby Thabazimbi na die Lephalale-gebied te gelei, sal ook begin.
Hierdie projek sal help om die opwekking van elektrisiteit in die land ’n hupstoot te gee. Mokonyane het ook aangekondig dat die Lushushwane-grootmaatwaterskema in Mpumalanga teen Oktober 2017 voltooi sal wees.
