Die amptelike bekendstelling van Klouter-Bouters het op 31 Januarie 2023 by De Meul Boerdery, sowat 20 km vanaf Prieska, plaasgevind.
Die plaas Remhoogte is die tuiste van die splinternuwe sentrum, wat aanvanklik elke weekdag plek gaan hê vir 14 kinders tussen die ouderdom van twee en vyf jaar. Met die beplanning van die sentrum is fyn gekyk na die ligging van die sentrum en die klimaat van die omgewing. Die moderne gebou is omgewingsvriendelik en gebruik van groen tegnologie soos sonkrag en natuurlike lig.
Me. Marelize de Villiers van De Meul Boerdery, wat namens die De Villiers- familie die projek gelei het, sê die opening van die sentrum verwesenlik ’n jare lange droom danksy die ondersteuning van die hele familie en haar passie vir kinders en opvoeding. “Kinders van Remhoogte wat by die Laerskool Bloukrans skoolgaan, sal in ’n veilige omgewing kan speel en studiehulp ontvang. Ons visie vir die kinders is om hulle groter te laat droom en te besef daar is ’n wye wêreld daar buite.”
Klouer-Bouters het ’n opgeleide opvoedkundige en ’n assistent wat sal verseker dat die kinders opvoedkundig gestimuleer word om op ’n holistiese wyse te ontwikkel. Die kinders sal gebalanseerde etes kry wat deur ’n dieetkundige ontwikkel is vir ontbyt, teetyd en middagete. “Dit is meer as ’n skool. Dit is ’n sentrum waar bybelstudie, naaldwerk en kinderkrans aangebied word,” sê De Villiers.
Ondersteuning
Me. Zelda Johnson, `n geakkrediteerde maatskaplike praktisyn en GWK se koördineerder van maatskaplike projekte, sal Klouter-Bouters die volgende 18 maande ondersteun. Sy speel ’n integrale rol om die onderwysers by sentrum svir vroeë kinderontwikkeling (VKO) te mentor en met volledige lesplanne by te staan. Ná 18 maande sal die boerdery amptelik die verantwoordelikheid vir die projek oorneem, terwyl die GWK-span steeds ondersteuning en raad sal bied. GWK sal voortgaan met besoeke een keer per kwartaal, die hantering van departementele verslae en ondersteuning aan onderwysers en ouers soos nodig.
Johnson sê vir 2023 het GWK ’n nuwe leerprogram geskep vir kinders op plase wat beloof om opwindend, baie kleurvol en hope pret sal wees. “Dit bied ruimte vir vrye spel, groot en fyn motoriese aktiwiteite, sowel as sensoriese, visueel-perseptuele en ouditiewe ontwikkeling wat uiters belangrik is tydens die grondslagfase.”
Mnr. Neil de Klerk, GWK se hoof van bemarking en kommunikasie, sê GWK se ambisie is om 100 VKO-skole op plase te vestig met die samewerking van boerderye en met die hulp en finansiering van ander vennote.
“Dit skep werk vir mense in die gemeenskap, onder meer die mense wat betrokke was by die oprigting van die sentrums, en nou die onderwyspersoneel. Daarby het dit ’n belangrike impak op die lewe van plaaskinders, wat die geleentheid het om deur die régte grondslagonderwys en gebalanseerde voeding gereed te wees vir ’n opwindende toekoms en alles wat daaruit gaan voortvloei.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
