Sowat 7 000 volstruise word in die Suid-Kaap uitgeslag nadat die H5N2-virus op nog drie plase opgespoor is. Die voorkoms van die virus is verlede week op ’n plaas naby Albertinia en twee plase naby Heidelberg bevestig.
Mnr. Piet Kleyn, waarnemende hoof uitvoerende beampte van die Volstruisbesigheidskamer (VBK), sê meer as 50 000 volstruise is uitgeslag sedert die voorkoms van die virus in April 2011 die eerste keer bevestig is.
Intussen het die Wes-Kaapse departement van landbou, saam met die nasionale Departement van Landbou, afgekondig dat die beheersone vir die virus, wat die beweging van volstruise beperk, nou bykans die hele Suid-Kaap insluit.
“Die beheersone is nou van die Breërivier tot by die Grootbrakrivier, aan die see se kant van die Outenikwa-bergreeks en die Langeberge. Dis amper die hele Suid-Kaap,” verduidelik Kleyn.
Rooikruis permit
Volgens Kleyn mag geen volstruise binne dié beheersone verskuif word sonder ‘n Rooikruis-permit nie. Volstruise wat na ‘n slagplaas vervoer word, moet ‘n Rooikruis-permit hê. Dié permit word deur ’n staatsveearts toegeken.
Dié permit het ’n lang proses vir die slagting van volstruise tot gevolg. Plase wat vry is van die virus, kry ’n permit van die VBK om die gunstigheid van sy volstruise vir slag te bewys. Dié permit is ergter nie genoeg om die diere na ‘n slagplaas te kan neem nie, ‘n Rooikruis-permit is ook nodig.
Dié permit behels dat ’n staatsveearts op die plaas moet wees terwyl die volstruise gelaai word. Die veearts moet dan die vragmotor met ’n Rooikruis-permit seël. Die veearts beweeg dan saam met die volstruise na die slagplaas waar hy of sy self die seël moet breek voordat die volstruise geslag kan word.
Volgens Kleyn is die situasie ’n groot terugslag vir die bedryf, want dit vertraag die proses om om uitvoerstatus aansoek te doen.
