Assessors is nog besig om skadebepaling te doen nadat ’n haelstorm “noemenswaardige” skade aan tafeldruiwe in die Onseepkans-gebied in die Benede-Oranjerivier van die Noord-Kaap aangerig het.
In die stadium is dit nog te vroeg om enige waarde aan die skade te koppel, maar die storm was baie gelokaliseerd en net enkel-plase van die Karsten-Groep, die A.S. Viljoen-boerdery en Capespan is daardeur geraak.
Mnr. Pieter Karsten van die Karsten-Groep sê die skade was noemenswaardig, maar in die stadium is dit buite die kwessie om ’n kostebepaling daaraan te koppel. Ook mnr.Gabriël Viljoen van A.S. Viljoen-boerdery sê later sal eers vasgesel kan word hoe ernstig die skade aan tafeldruiwe is.
Mnr. Bernie Denton van Capespan het ook vroeër aan www.freshfruitportal.com gesê ’n finale skadebepaling sal eers later bekend wees.
Die haelstorm het Dinsdag (23 September) skielik in die Onseepkans-gebied aan die Oranjerivier suid van die Namibiese grens voorgekom. Dit is redelik ver van die hoofproduksiegebiede van tafeldruiwe in die Benede-Oranjeriviergebied – wat nader aan Upington, Kakamas en op Kanoneiland geleë is.
Mnr. Andre van Wyk van SA Tafelduiwe in die Paarl, sê omdat dit ’n baie gelokaliseerde haelstorm was, word die omvang van die skade deur assessors van die Benede-Oranjerivier gedoen, en in die stadium is geen verdere inligting nog beskikbaar nie.
