Die moontlikheid word steeds ondersoek of Suid-Afrika, in ‘n poging om die grootskaalse stroop van sy renosters te keer, handel in renosterhoring gaan oopstel, het me. Edna Molewa, Minister van Omgewingsake gesê.
Meer as 730 renosters is reeds vanjaar vir hul horings gestroop is, en parlementslede het renosterstropery en die misdaad se uitwerking op die land se erfenis in die Nasionale Vergadering gedebatteer.
Die markwaarde vir ‘n 1 kg renosterhoring is sowat R585 000.
By openbare verhore wat gehou was in Kwazulu-Natal het gemeenskappe hier ‘n voorstel gemaak dat die Regering die verkoop van renosterhoring moet wettig om die diere te red. Hulle redenasie is dat daar reeds ‘n mark daarvoor bestaan, ongeag of die Regering vir of teen dit is nie.
Molewa het uitgewys dat die Regering in die verlede en steeds met groot sukses renosters na ander gebiede verskuif, waar hulle veilig en beter beskermd is. Dit is wetenskaplik bewys dat die verskuiwings bygedra het tot die groei van die renosterbevolking.
Dr. Pieter Mulder, leier van die VF Plus, het heksejag-operasies in Mosambiek en ander lande voorgestel as afskrikmiddel in pogings om die wit-renosterspesie van uitwissing te red.
Om die enorme skaal van die probleem uit te wys, het hy gesê dat sommige mense bereid is om meer vir renosterhoring te betaal as vir goud omdat hulle glo dat dit sekere medisinale waarde het.
“Navorsing het gewys dat die horing geen medisinale waarde het nie. Indien jy dit self wil toets kan jy jou eie naels vyl en drink. Die uitwerking sal dieselfde wees.” Mulder het ook ‘n beroep gedoen dat die ondersoek na die wettige verkoop van renosterhoring bespoedig moet word.
Me. Terry Stander, die Demokratiese Alliansie se skaduminister vir omgewingsake, het gesê politieke wil ontbreek om renosterstropery voldoende hok te slaan. Intelligensie is een van die swakhede wat die departement ses jaar gelede, met die begin van die krisis, uitgewys het. “Waarom het ek dan ‘n lys van 72 verdagte stropers, maar nie een van hulle is behoorlik ondersoek of skuldig bevind nie? Jy kan hulle self bel op gelyste telefoonnommers.”
Stander het gesê die insamel en ontleding van intelligensie sal operasies help wat georganiseerde misdaad ontwrig en gevalle van stropery voorkom. Sy het voorgestel dat Ministers renosterstropery moet prioritiseer wanneer hulle hul konsepbegroting vir die medium- en langtermyn vir nasionale intelligensie bepaal, en ‘n afdeling by intelligensie moet skep wat spesifiek kyk na die ontwikkeling van strategieë.
