Goeie nuus vir uitvoerders is dat ’n beoogde verhoging van 18% in hawetariewe afgekeur is. Dié tariewe styg met slegs 2,76%.
Transnet se Nasionale Hawe-owerheid (TNHO) se beoogde verhoging van 18% vir dienste en geriewe is 'n nekslag toegedien toe die Hawereguleerder dit afgekeur het.
Die Hawereguleerder het beslis dat 'n verhoging van 2,76% voldoende is vir die boekjaar 2012/’13 wat op 1 April begin, berig I-Net Bridge.
Nuus van hierdie verwikkeling het gekom nadat pres. Jacob Zuma in sy Staatsrede aangekondig het dat die uitvoerders van vervaardigde goedere later vanjaar goedkoper hawetariewe sal betaal.
Die kwessie van hoë tariewe was een van die kwessies wat na vore gekom het toe Zuma die motorvervaardigingsektor in Port Elizabeth en Uitenhage besoek het.
Die Hawereguleerder en Transnet se verlaging van tariewe vir die uitvoer van vervaardigde produkte is gelykstaande aan sowat R1 miljard, het Zuma aangedui.
15 Februarie 2012
