Deur helikopters “eerder vroeër as later” in te span, kon Wes-Kaapse veldbrande die afgelope maand baie doeltreffend in bedwang gebring word.
Mnr. Anton Bredell, Wes-Kaapse minister van plaaslike regering, omgewingsake en ontwikkelingsbeplanning, sê deur voorkeur te gee aan lugondersteuning, kon hulle sowat 90% van brande binne die eerste uur blus.
“Hoewel dit duur is, keer dit dat klein brande in wegholbrande ontaard wat ernstige skade aan eiendom of selfs lewensverlies kan meebring.”
Mnr. Ennie Stofberg, ’n vrugteprodusent van Dwarsberg Trout Hideaway naby Rawsonville, het vroeër vandeesmaand aan Landbouweekblad gesê hulle het lig afgekom van ’n bergbrand in die Dwarsberg.
“Danksy die vinnige optrede van drie helikopters het ons geen skade gely nie.”
Dit het die Wes-Kaapse regering in Januarie meer as R10 miljoen uit die sak gejaag om brande te beveg. Dit sluit 14 groot brande en dosyne kleineres in.
“Die koste sluit 24 lugeenhede in, wat wissel van opsporingsvliegtuie teen R4 000 per uur, tot ’n groot Black Hawk-helikopter teen ’n koste van R78 000 per uur.”
Tot dusver het ’n brand op 8 tot 12 Januarie by Kleinmond, wat oor sowat 5 372 ha gewoed het, die meeste skade aangerig. Altesaam 10 ha kommersiële fynbosaanplantings het in die slag gebly en plaasheinings is verwoes.
“Mense besef nie dat daar dikwels verskeie brande is wat gelyktydig bestry moet word nie. Tydens die Kleinmond-operasie was daar ook nege ander brande wat aktiewe ingryping deur branddienste nodig gehad het,” sê Bredell in ’n verklaring.
Met warm somerweer wat oor die volgende paar maande verwag word, is dit noodsaaklik dat mense verantwoordelik omgaan met oop vure, het Bredell gemaan.
“Meld enige brande gou aan by die naaste plaaslike gesagliggaam. Dit sal ons help om spoedeisend op te tree.”
