Landbou-ondernemings moet tot die stryd rondom grondhervorming toetree en van die “tranegeld” help delg, sê mnr. Corwyn Botha, besturende direkteur van Kaap Agri.
Botha het tydens die 11de AMT-kongres in Pretoria opgemerk dat die hele landbousektor – van die verskaffers, soos Woolworths, tot by produsente – betrokke moet raak om te help om grond oor te dra.
Volgens Botha moet landbou-ondernemings betrokke raak. ”Ons kan na almal luister wat nie grond het nie en wag, of ons kan toetree en die tranegeld tussen dit wat vir ‘n plaas aangebied word en die markwaarde wat die eienaar wil hê, opmaak. Ons weet die staat kan dit nie alleen doen nie, ons moet help.”
Botha meen landbou-ondernemings moet ook dié opkomende boere wat deur hulle gehelp is om grond te kry, ondersteun met voorligting en mentorskap. “Wat sal dit regtig van ons verg om hierdie 20% waarna die staat verwys, te help?”
Voorstel aan Regering
Volgens Botha moet landbou-ondernemings rondom ‘n onderhandelingstafel gaan sit en ‘n voorstel saamstel om aan die Regering voor te lê, omdat dit tot voordeel in die toekoms sal wees.
Terselfdertyd sê Botha moet landbou-ondernemings ook daarop fokus om werksgeleenthede te skep. “Ons hoor daar is meer as een miljoen werksgeleenthede verloor: As elke landboubesigheid nog ‘n paar werke skep, kan ons maklik dié getal laat krimp.”
Botha meen dat enige onderneming een kernrede het om te kan bestaan: “Dit is dat jou kliënte moet beter doen omdat jy bestaan, as wat hulle sou gedoen het sou jy nie bestaan het nie.”
13 September 2011
