Die SA Poskantoor het ’n aanlyn diens vir die hernuwing van voertuiglisensies bekend gestel. Die volle hernuwingsproses, ingesluit die betaling, kan aanlyn gedoen word by https://www.sapomvl.co.za, sê die Poskantoor in ’n verklaring.
Om ’n voertuiglisensie aanlyn te hernieu, is volgens die onderneming vinnig en maklik nadat die eenmalige registrasie op die webblad afgehandel is. Die Poskantoor sê hy het omvattende stappe in werking gestel om te verseker dat klante se data veilig is.
Geen kommissie word op die hernuwingstransaksie gehef nie. Betalings word deur Masterpass gedoen, wat ’n mens in die Google Play Store vir Android-toestelle of die Apple App Store vir Apple-toestelle kan aflaai.
Die aanlyn hernuwingsdiens is in al die provinsies buiten die Wes-Kaap beskikbaar. Die Poskantoor hoop om dit eersdaags ook in die Wes-Kaap te bied.
Afgelewer of kry dit by ’n poskantoor
Om die lisensieskyfie te kry, kan ’n mens een van twee moontlikhede kies: Die Poskantoor kan die skyfie teen R75 by die kliënt aflewer, indien straataflewering daar beskikbaar is, of die kliënt kan ’n tak kies wat gerieflik vir hom is om die skyfie af te haal. Daar is geen ekstra koste betrokke as die skyfie by ’n tak van die poskantoor afgehaal word nie.
Sodra die skyfie gereed is vir aflewering, of om by ’n plaaslike poskantoor afgehaal te word, ontvang die klant ’n SMS. Die Poskantoor verwag dat ’n nuwe skyfie binne drie tot vyf werkdae by ’n klant sal wees. In afgeleë gebiede sal dit ’n paar dae langer duur.
Groot vraag na diens
Die Poskantoor sê die aanlyn hernuwing van voertuiglisensies is die eerste stap om sy strategie genaamd Poskantoor in my broeksak te verwesenlik.
Daar is ’n enorme aanvraag na die diens om voertuiglisensies te hernieu. In die Poskantoor se vorige boekjaar is sowat 3 miljoen voertuiglisensies by poskantore hernu.
Die nuwe aanlyn hernuwingsdiens is bykomend tot die bestaande diens waardeur voertuigeienaars hul voertuiglisensies by sekere poskantore kan hernu. Vir dié diens geld daar ook geen kommissie nie.
Die onderneming bied ook ’n diens vir vlooteienaars aan, waar die Poskantoor, teen betaling, die lisensievorms by die vlooteienaar se kantoor afhaal, die hernuwings doen en dan die lisensies by die vlootkantoor terugbesorg.
