Me. Amór Snyman en haar man, Reynier, wat in die distrik Viljoenskroon boer, is die wenner van die reis vir twee na die Son-Safari-landbouskou op Mauritius. Laeveld Agrochem en Landbouweekblad het die kompetisie aangebied.
Sy is baie opgewonde. Sy is besig om haar voorraad sonbrandroom aan te vul en ’n notaboekie te bekom om al die waardevolle inligting waaraan sy blootgestel word, neer te skryf.
Snyman sê dit voel wonderlik. Sy het ingeskryf toe sy en haar man Landbouweekblad se Herlewingslandboukonferensie op Reitz bygewoon het. Dit is immers vandag April-gekkedag en sy het gedink die oproep was ’n grap en wonder steeds of dit nie moontlik ’n poets is nie.
Sy het ingeteken op Landbou.com om toegang te kry tot die tydskrifte. Amór geniet Landbou Boerekos en haar man lees elke week Landbouweekblad en luister soms na artikels op die webwerf. Sy sê hoewel sy nog effe geskok is, is sy opgewonde en sien sy baie uit na hul reis.
Dié Son-Safari-landbouskou is ’n week lange landbouskou wat vanaf 30 April tot 5 Mei in Mauritius deur Laeveld Agrochem aangebied word.
Die landboukonferensie sal oor ses dae by die Sugar Beach-vakansieoord plaasvind. Die week se program is verdeel in verskeie kategorieë en bestaan uit sprekers, uitstallings, vermaak, onstpanning en baie meer.
Sugar Beach-vakansieoord
Dié oord word eksklusief vir Son-Safari-gaste bespreek, en dit is waar die aanbiedings, uitstallings en konferensie sal plaasvind. Die sprekers gaan oor verskillende landbouverwante onderwerpe gesels.
Covid-19-regulasies
Mauritius vereis dat alle gaste ingeënt is teen covid-19. ’n PCR-covid-19-toets word nie meer benodig nie, maar ’n geldige dokument vir ’n negatiewe covid-19-toets moet verskaf word. Indien die landbouskou afgelas word weens covid-19-beperkings deur Suid-Afrika of Mauritius, sal gaste ten volle terugbetaling ontvang.
