Suid-Afrika se ekonomie en die wêreldekonomie gaan vir die volgende vier jaar stadiger groei as wat verwag word, sê mnr. Mike Schüssler, ekonoom verbonde aan Economists. “Verskeie kenners meen dat 'n ekonomiese resessie tot 2020 kan duur,” verduidelik hy.
Schüssler het op die 11de AMT-kongres in Pretoria gesê hy verwag dat die land se inflasiekoers oor die volgende drie jaar rondom 6,5% sal beweeg. Hy verwag dat voedselpryse oor die volgende 18 maande sal styg en hoog sal bly, maar daarna weer sal daal.
Wat die rand betref, voorspel Schüssler dat dit teen einde vanjaar die vlak van R8,75 teenoor die dollar kan bereik, en volgende jaar tot R9,35 kan verswak.
Koop nou
Hy sê wêreldkenners meen dat die lae vlakke van rentekoerse wat tans gehandhaaf word, tot 2018 kan voortduur. “So, dit is nou ’n goeie tyd om masjinerie aan te koop.”
Schüssler sê die probleme wat tans deur die landboubedryf ondervind word, word meer deur weerfaktore aangedryf as deur ekonomiese faktore. Hy meen die bedryf het sy eie momentum en sal nie dieselfde probleme ervaar as, byvoorbeeld, die staal- en mynboubedryf, wat onder lae uitvoerpryse en druk omstandighede gebuk gaan nie.
