’n Handelsoorlog is nodig om die ongelyke speelveld waarin die Suid-Afrikaanse pluimveebedryf met Europese lande moet meeding, gelyk te maak, meen die Food & Allied Workers Union (FAWU).
Dié organisasie het ’n optog na die Parlement gehou en ’n petisie aan die wetgewende gesag oorhandig.
FAWU sê met elke dag wat verby gaan en die Regering toelaat dat die Europese Unie sy gesubsidieerde hoendervleis in Suid-Afrika stort, gaan honderde werke verlore.
Toe hier toe!
“Genoeg is genoeg. Dis nou die einde. Ons sal elke dag voor die Parlement kom staan as dit moet,” sê mnr. Meshac Ntechane, Wes-Kaapse sekretaris van FAWU.
Die pluimveebedryf het reeds sowat 1 500 werkers geoormerk vir uitdiensstelling wanneer een van sy drie verwerkingsmaatskappye toegemaak gaan word weens die verlies van R1 miljoen per dag as gevolg van goedkoop hoender wat uit die EU ingevoer word.
FAWU het versoek dat die Parlement die Kabinet en die Ministerie van Handel en Nywerheid moet ondersteun in hul pogings om die storting van hoenders uit die EU te keer.
Nog vereistes
*Daar word ook gevra dat ’n ooreenkoms met die lande aangegaan word wat verseker dat Suid-Afrikaanse hoenderprodukte die EU-mark betree deurdat die Suid-Afrikaanse Regering weerwraak neem deur tegniese versperrings en tariefvrye beskermingsmaatreëls in te stel.
*Onderhandelinge moet vinnig geskied om meer werksverliese te voorkom.
* Die produksie en verwerking van pluimvee is hoogs gesubsidieer in die EU, terwyl plaaslike pluimveeboere sonder regeringsubsidies moet klaarkom.
