Die verhoogde kanaalmuur naby Worcester is op 10 Februarie amptelik deur mnr. Senzo Mchunu, minister van water en sanitasie, in gebruik geneem.
Die muur is vir 4 km met 30 cm verhoog. Dit beteken ’n bykomende 33 miljoen kubieke meter water kan in die dam opgegaar word, sê die departement van water en sanitasie in ’n verklaring.
Dit
maak die uitbreiding van besproeiingslandbou moontlik, wat die landbou-ekonomie
van die omgewing ’n hupstoot sal gee en geleenthede vir indiensneming en
sake-ontwikkeling in die Breederiviervallei sal bevorder.
Mchunu
het op die seremonie die werkers vir hul toewyding bedank. Die projek is in
Oktober verlede jaar voltooi, binne die beoogde tyd en ook binne die begroting.
“Met
die winterreën wat nader kom, is dit die mees geskikte tyd om die kanaal te
oorhandig,” het hy gesê.
Die
Brandvlei-voedingskanaal is deel van die Groter Brandvlei-waterskema. Dit word
deur die departement bedryf en bestaan uit twee staatsdamme, Brandvlei- en
Kwaggaskloofdam.
Mnr.
Anton Bredell, Wes-Kaapse minister vir plaaslike regering, omgewingsake en
ontwikkelingsbeplanning, het gesê die projek ter waarde van R21 miljoen sal na
verwagting die groei van die landbou-ekonomie van die streek versnel en
stimuleer en benewens bykomende besproeiing ook boere stroomaf se
watersekerheid verbeter.
“Die
Brandvlei-kanaalprojek, wat deur die nasionale departement van water en
sanitasie gefinansier en bestuur is, is ’n goeie voorbeeld van hoe belegging
van ’n relatief klein hoeveelheid geld baie groter voordele kan meebring,” het
hy in ’n verklaring deur sy departement gesê.
Clanwilliamdam
moet aandag kry
Bredell het gevra dat die vergroting van die Clanwilliamdam, ’n projek van R3,5 miljard, nou Mchunu se volle aandag moet geniet. “Dié projek sal watersekerheid aan die boeregemeenskap van die Benede-Olifantsrivier bied en dit moontlik maak om ’n bykomende 6 000 ha besproeiingslandbou te ontwikkel. Dit sal die hele streek help om ekonomies te groei, werk te skep en armoede te bestry.”
Volgens
hom is waterinfrastruktuur, soos die Brandvlei- en Clanwilliamdam, asook
munisipale reservoirs, watersuiweringsaanlegte, boorgate en pypnetwerke basiese
instrumente waarmee watersekerheid aandag kan kry, veral in die konteks van
klimaatsverandering en ’n groeiende bevolking.
“Daar
word voorspel dat die Wes-Kaap warmer en droër gaan word. Terselfdertyd het ons
’n positiewe bevolkingsgroei. Ons moet waterinfrastruktuur beplan en daarin
belê om seker te maak ons kan basiese dienste, soos water- en riooldienste, aan
al ons inwoners verskaf.”
Bredell
is bekommerd omdat die damvlakke in die Wes-Kaap volgens die jongste syfers
gemiddeld 50,9% is. “Ons is nog nie deur die somer nie en kan nie voorspel hoe
ons winterreënseisoen gaan lyk nie.”
Hy het gesê dit is nodig dat die nasionale departement van water en sanitasie en belanghebbers in die watersektor meer gereeld byeenkom om die behoefte aan waterbeperkings te bepaal. “Die departement beoordeel die situasie tans een keer per jaar, in November, maar teen volgende November kon die situasie al te ver versleg het.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
