Die prys van melk en melkprodukte gaan na verwagting styg, maar sal waarskynlik in die tweede helfte van die jaar weer daal.
So sê mnr. Alwyn Kraamwinkel, hoofbestuurder van die SA Melkprosesseerdersorganisasie (Sampro). Kraamwinkel sê die plaashekprys vir melk styg gewoonlik aan die begin van die jaar.
“Die hoogste prys word in lae produksietye betaal en die laagste prys in hoë produksietye.” Beter melkpryse loop vanjaar hand aan hand met ’n stewiger mielieprys wat voerkoste beïnvloed.
Vraag kan daal
In die Januarie-verslag oor die plaaslike en internasionale situasie op die mark waarsku Kraamwinkel dat die vraag na melkprodukte kan daal te midde van ’n stadige ekonomiese herstel en duur administrasiekoste.
Dít volg die jaarlikse neiging van die ekonomie vir melkprodukte.
Wêreldwyd het melkproduksie toegeneem. “Die hoër produksie is omdat die plaashekprys in die grootste melkproduserende lande gestyg het. Die prys van onverwerkte melk wissel meer in daardie lande as in Suid-Afrika.”
Laasgenoemde prysstygings het nie tot hoër melkpryse in die internasionale melkmark gelei nie. Suid-Afrika se melkproduksie was egter verlede jaar net 0,19% hoër as in 2010.
26 Januarie 2012
