Die manier waarop die woord “botter” op die verpakking van ’n nuwe smeer van Stork gebruik word, het pas in die hooggeregshof gedraai en is nou dalk ook op pad appèlhof toe.
Die hooggeregshof in Pretoria het Clover, wat aansoek gedoen het om ’n interdik teen Siqalo Foods, gelyk gegee dat Stork Butter Spread se etiket misleidend is.
Waarnemende regter Livhuwani Vuma het op 12 November ’n interdik toegestaan waarvolgens Siqalo Foods, wat volgens sy webtuiste ook handelsmerke soos Flora en Rama besit, die etiket binne sewe dae van produkte af moet verwyder en waar dit onmoontlik is, die produkte moet vernietig.
Mnr. Stephen Heath, woordvoerder van Siqalo Foods, het egter op 17 November aan Landbouweekblad gesê dat die maatskappy binne die volgende week ’n aansoek sou bring om verlof tot appèl en dat die produk dus vir eers wettig op winkelrakke bly.
Luidens die uitspraak het Siqalo Foods op 1 Maart vanjaar dié mediumvetproduk begin versprei en bemark. Dit bevat 38% botter en 62% plantolies en ander bestanddele.
‘Verwarrend’
Vuma sê Stork mag nie onwettig met Clover meeding deur gemodifiseerde botterprodukte te bemark met ’n etiket waarin die woord “butter” die oorheersende eienskap is nie.
Volgens haar is die lettertipe van die woord “butter” baie groter as die “Stork” en “spread” en die klasbenaming “modified butter” en produkbeskrywing “medium fat modified butter spread with sunflower and palm oils” baie kleiner en feitlik onleesbaar.
“Selfs ek self was, met die eerste sien van die etiket, onder die indruk dat die produk in werklikheid botter of suiwer botter is en nie gemodifiseerde botter nie, wat dit eintlik is. Eenvoudig gestel, die etiket het my beide mislei en verwar.”
Dit is volgens Vuma in stryd met die Wet op Landbouprodukstandaarde (Wet 119 van 1990).
Vuma verwys na ander uitsprake waarin onder meer beslis is dat dit oor ’n verbruiker se eerste indruk gaan, al duur dié indruk net vir ’n kort oomblik.
Handelsnaam
Sy verwys daarna dat geen woord of uitdrukking op ’n verpakking kragtens die wet groter mag wees as die klasbenaming nie, tensy dit ’n geregistreerde handelsmerk of -naam is.
Siqalo Foods het in sy aanvullende beantwoordende verklaring aangevoer dat hy besig is om die naam Stork Butter Spread as handelsnaam te registreer.
Luidens die hofstukke het Nejahmogul Technologies, die inspeksiediens vir die suiwelbedryf, die etiket gemagtig buiten vir die kwessie rakende lettergroottevereistes. Clover het egter aangevoer dat die hof nie hierdeur gebind word nie omdat die etiket nie aan wetgewing voldoen nie.
Clover het by navraag gesê dat hy nie in dié stadium wil kommentaar lewer nie.
