Maar daar is nóg amptenare en politici wat betrek kan word by korrupsie by dié melkplaas, waarsku dr. Jack Armour, bedryfshoof van VL.
Die saak hou verband met R228 miljoen wat na bewering via die melkplaas by Vrede in die Vrystaat na Gupta-maatskappye herlei is sonder dat die veronderstelde begunstigdes van die projek enige voordeel gekry het. Die Vrystaatse departement van landbou en landelike ontwikkeling het dié lys van begunstigdes as regverdiging gebruik vir die miljoene wat die staat in die projek belê het. Dit het egter net Estina, ’n maatskappy van die Gupta-familie, wat by die projek betrokke was, gebaat.
Mnr. Mosebenzi Zwane, LUR vir landbou in die tyd toe die beweerde korrupsie plaasgevind het, het Vrydag saam met mee. Ugeshni Govender en Ronica Ragavan, voormalige direkteure van Gupta-maatskappye, in die Bloemfonteinse landdroshof verskyn. Zwane en Govender is op borgtog van R10 000 elk vrygelaat en Ragavan is op waarskuwing vrygelaat. Sy is reeds in 2018 in hegtenis geneem, terwyl Zwane en Govender hulle op 28 September aan die polisie oorgegee het.
Armour sê terwyl Zwane ’n verdagte in die Estina-saak is, behoort hy ook terug te staan uit sy politieke ampte. “Ons het al drie briewe aan hom geskryf as voorsitter van die paaie-komitee oor die paaiekrisis in die Vrystaat en geen antwoord gekry nie.”
Armour sê geregtigheid behoort nou “sy pad te loop”. Mnr. Peter Thabete, voormalige hoof van die departement, het reeds in die hof verskyn op aanklagte van korrupsie. “Zwane was sy direkte hoof, maar daar was ander base voor hom en ander base ná hom wat vermoedelik ook deel was van die staatskaping.”
Volgens adv. Andrea Johnson, hoof van die nasionale vervolgingsgesag se ondersoekdirektoraat, toon die plasing van die Zwane-saak op die hofrol die vasbeslotenheid van die direktoraat om met staatskapers af te reken. “Die saak behoort die mense van die Vrystaat daaraan te herinner dat hierdie saak nie vergete is nie. Dit duur egter lank om te ondersoek en die gepaste aanklagte saam te stel wanneer dit so ’n ingewikkelde kwessie is.”
Die verhoor vind van 27 tot 30 Maart 2023 plaas.
Al die verdagtes in die saak moet op 2 November weer in die hof verskyn.
