Boere moenie moed verloor oor arbeidskwessies nie, want dit kan bestuur word, sê Agri SA.
Mnr. Henk Vermeulen, ondervoorsitter van dié organisasie se arbeids- en maatskaplike beleidskomitee, sê hy hoor gereeld boere wat sê dié kwessies is so ‘n teer punt dat hulle eerder nie daaraan wil dink of dit wil bespreek nie.
Vermeulen sê die georganiseerde landbou besef dat die verskeie wetgewingstukke in plek, asook die wetsontwerpe wat sirkuleer, plaas toenemende ekonomiese en administratiewe druk op boere: “Die bedryf moet onthou hy het die vermoë om dié sake te bestuur. Die fokus moet net wees op hoe om dit te bestuur, nie op hoe sleg dit is nie.”
Werk is minder
Volgens Vermeulen dui Statistieke SA se syfers aan dat werksgeleenthede vir plaaswerkers van 1993 en 2007 met 27% gedaal het. “Dit lok gereeld kritiek uit, maar daar moet onthou word dat die aantal plaaseenhede in dieselfde tydperk met 31% gedaal het.”
Wat die Regering se skeppingdoel van 190 000 bykomende werksgeleenthede wat in die bedryf geskep moet word, betref, sê Vermeulen voortdurende konsultasie en gesprekke is nodig. “Ons moet in gesprek bly met die Regering, want as hulle wil hê ons moet dié mikpunt bereik, gaan hulle die regte omgewing daarvoor moet skep.”
Vermeulen sê verskeie mooi verhale bestaan ook oor die opleiding van werkers en werkskepping deur boere, maar die publiek weet nie daarvan nie. Hy meen dat dié verhale op ‘n gereelde basis aan die publiek bekend gemaak moet word om bewustheid te skep.
14 Oktober 2011
