Dit is onaanvaarbaar dat die Polisie nege jaar ná die instelling van sektorpolisiëring steeds daaroor praat, sê die parlement se portefeuljekomitee vir polisie. Luidens ’n berig op News24.com, het me. Lydia Chikunga, die voorsitter, genl. Bheki Cele na ’n voorlegging aangespreek en gesê dit is hoog tyd dat die kwessie aandag kry.
“Ons wil nie oor en oor oor dieselfde goed praat nie. Die stelsel is in 2002 ingestel. (Dit is) amper nege jaar later wat ons oor een ding praat. Ek kan nie verstaan hoekom moet ons jaar in en jaar uit daaroor praat nie,” aldus Chikunga.
Verbetering
Sektorpolisiëring is ontwerp om noue samewerking tussen die Polisie en gemeenskappe te bewerkstellig om misdaad te voorkom. Chikunga sê volgens haar ervaring werk die stelsel goed in die paar gebiede waar dit al ingestel is.
In wegspringblokke
Cele het in Oktober verlede jaar gesê die implementering was steeds in “die wegspringblokke” weens ’n tekort aan personeel en voertuie. Dieselfde feite is tydens Donderdag (30 Maart), se voorlegging bevestig.
Chikunga kon nie verstaan hoekom die proses so lank duur nie, en sy het ook opgemerk dat die nasionale kantoor die verskuiwing van personeel moet monitor, want sy verstaan nie hoekom stasiekommissarisse so gereeld verander word nie.
Bron: News24.com
31 Maart 2011
