Die wildbedryf moet ophou om verskonings te maak by mense en instansies wat aanvalle op jagters en wildboere doen.
Die bedryf moet eerder klem lê op die positiewe dinge waarmee die hy kan spog, het prof. Melville Saayman, direkteur vir toerismenavorsing aan die Universiteit van Noordwes, op die negende internasionale wildboersimposium in Windhoek, Namibië, gesê.
Hy het verwys na ’n gesprek tydens die simposium om ’n ander woord vir trofeejag te vind, omdat dit in sommige kringe ’n negatiewe konnotasie het. “Hou op om jammer te sê en vertel die mense eerder wat die wildbedryf al bereik het, soos al die werksgeleenthede wat geskep word en miljarde rande wat wildboere vir die land verdien.
“Die mynbedryf rig baie skade aan die omgewing aan. Hulle vra egter nie om verskoning daaroor nie, maar lig die publiek eerder in van die werksgeleenthede en valuta wat die hulle verdien,” het hy gesê.
Die wildbedryf moet eerder méér kreatief dink om hulself positief te bemark, soos om nuwe bemarkingsgeleenthede vir wildsvleis en –produkte te soek en op te hou om name vir hul plase te kies wat moeilik is om uit te spreek en gou weer vergeet word,” het hy gesê.
