Huldeblyke en loftuitinge stroom in van oor die wêreld heen ná die dood van dr. Michael Bradfield (56) verlede week. Hy het gesterf ná ’n lang stryd teen kanker.
Mnr. Mecki Schneider, voorsitter van die Lewendehawe-registrerende Federasie (LRF), waarvan Bradfield die uitvoerende hoof was, sê hy laat ’n groot leemte in die Suider-Afrikaanse lewendehawebedryf. Die boodskappe wat instroom, toon dat hy nie slegs plaaslik gerespekteer is nie, maar ook internasionaal. Een van sy grootste prestasies was die instelling van Breedplan in die streek, een van die wêreld se mees gevorderde stelsels van prestasietoetsing en genetiese evaluering.
Hy was as strateeg op talle vlakke betrokke, waaronder die gewilde Veeskool waar veeboere en ander betrokkenes aan deskundiges van oor die hele aarde blootgestel is, en die herstrukturering van die LRF. Bradfield was ook ’n stigterslid van die Vleisbees-genomikaprogram.
Mnr. Johan de Vos, voorsitter van die Wagyu-genootskap, waarvan Bradfield die uitvoerende hoof was, sê die rooivleisbedryf het ’n reus verloor, maar hy laat groot voetspore agter. Hy was ’n toegewyde wetenskaplike. Sy bydrae tot die genetiese verbetering van veral Suider-Afrikaanse beesrasse was monumentaal en sy gereelde artikels in landboupublikasies, lesings en konsultasies was gefundeer op seleksie op grond van meetbare teelwaardes. Sy kundigheid is wyd erken en hy het gereeld konsultasie in ander Afrika-lande en Suidoos-Asië gedoen en lesings reg oor die wêreld aangebied.
Mnr. Stephen Miller, direkteur van die dieregenetika-en-teeleenheid (Agbu), Universiteit van New England, Australië, sê nog voordat Bradfield sy doktorsgraad in beesteling ontvang het, was dit reeds duidelik dat hy nie ’n tipiese akademiese loopbaan sou volg nie, want hy het net aan veeteelt en boere gedink. Sy skaars karaktertrek was om met mense te werk, te kommunikeer en strategies te werk.
Mnr. Hugh Nivison, besturende direkteur van die landboubesigheids-navorsingsinstituut, Australië, sê Bradfield het nie sy gelyke gehad wat energie en geesdrif betref nie. Sedert hy tydens sy verblyf in Australië by Breedplan betrokke geraak het, was Bradfield vasbeslote dat Suider-Afrika se beesboere dieselfde voordeel van genetiese verbetering tot hul beskikking moes hê. Sy nalatenskap met die LRF, Veeskool, naspeurbaarheid en vleis se eetgehalte sal voortleef.
Prof. Cliff Lamb, hoof van die departement dierkunde, Texas A&M-universiteit, Amerika, sê Bradfield was ’n visionêr wat erken moet word as die mens wat vleisbeesproduksie in Suider-Afrika hervorm het. Hy was deeglik opgelei en ’n gerespekteerde kundige.
*Volgens De Vos vind 'n diens om Bradfield se lewe te vier op die 17de Januarie by die Irene Country Club plaas.
