Die hoeveelheid plaaslike voer vir braaihoenders wat gebruik sou word as verlede jaar se ingevoerde hoender eerder plaaslik geproduseer is, is sowat 1,5 miljoen ton.
Die beraamde waarde hiervan is R8,2 miljard, sê mnr. De Wet Boshoff, uitvoerende direkteur van AFMA, die vereniging vir dierevoervervaardigers van Suid-Afrika. Die invoer plaas volgens hom 'n groot demper op die plaaslike voerbedryf.
(Lees ook: Tsoenami van EU-hoender tref SA)
Altesame 11,7 miljoen ton voer met 'n bruto omsetwaarde van sowat R50 miljard is in 2015/’16-boekjaar in Suid-Afrika geproduseer. AFMA-lede, wat die formele sektor verteenwoordig, het sowat 61% hiervan by 71 vervaardigingsaanlegte landwyd geproduseer, met 'n gemiddelde produksie van 98 000 ton per jaar per voermeule.
Bruto omsetwaarde van R31 miljard
Afma-lede se totale voerproduksie, vir alle spesies, was 7 183 107 ton met 'n beraamde bruto omsetwaarde van R31 miljard.
Hiervoor is 3,5 miljoen ton mielies en mielieprodukte en 1,2 miljoen sojaboonmeel as hoofproduksiemiddele gebruik. Altesame 3 323 278 ton braaihoendervoer is geproduseer, met 'n beraamde omsetwaarde van R17,6 miljard en 'n nasionale markaandeel van 46% van alle produkte.
As 'n mens net na hoenderstukke aan die been kyk, is die hoeveelheid wat in 2016 ingevoer is, gelykstaande aan 378 miljoen braaihoenders.
Omgeskakel na braaihoender
Boshoff sê as dit omgeskakel word na braaihoendervoer, verteenwoordig dié invoer 620 000 ton voer. “ 'n Styging van 620 000 ton in verkope van braaihoendervoer sal nasionale voerverkope tot 12 356 817 ton laat styg.”
“Dit sal groei in voerverkope tot 5,3% laat styg, wat beduidend meer is as die blote 0,7%-groei wat in die 2015/’16-boekjaar behaal is,” sê Boshoff.
Stukke aan die been verteenwoordig 42% van totale invoervolume en meganies ontbeende vleis 40%.
Strategiese kwessies
Boshoff sê as die Regering en die bedryf ooreen kan kom oor strategiese kwessies rakende ekonomiese transformasie en belegging tot voordeel van nuwe toetreders, kan plaaslike geproduseerde meganies ontbeende vleis in die toekoms 'n strategiese groeigebied wees.
Dit kan plaaslike verkope van braaihoendervoer potensieel tot 12 947 369 ton laat styg en so tot groei van 10,3% lei.
