“Tyd en spoed is nou die belangrikste. Die inmaakbedryf moet op ’n manier tyd koop om die inmaakfabriek Langeberg & Ashton Foods (L&AF) so lank moontlik oop te hou, al is dit eers net tot die einde van die huidige vrugteseisoen tot ’n nuwe oplossing gevind is. As die fabriek eers finaal gesluit is, gaan dit feitlik onmoontlik wees om dit weer te open. Daarom kan dit kan nie toegelaat word nie,” het mnr. Jacques Jordaan, uitvoerende hoof van die Inmaakprodusente-vereniging, by Rawsonville op ’n massa-vergadering van ontstelde inmaakvrugteprodusente gesê.
Sowat 200 hoogs bekommerde inmaakvrugteprodusente van oor die hele Boland het die vergadering bygewoon. ’n Vasbeslotenheid dat die “fabriek nie mag sluit nie”, was duidelik voelbaar. Produsente is verbind daartoe om alles te doen om te keer dat die fabriek sluit. ’n Inmaakfabriek van wêreldformaat wat oor 70 jaar opgebou is, durf nie gesluit word nie, was die gevoel. Daar is ook op tussentydse strategieë besluit om die sluiting te stuit, wat selfs ingryping deur die Wes-Kaapse regering kan insluit.
“Ek kry koue rillings om te dink dat een van Suid-Afrika – wat een van die topsewe inmaakvrugteproduserende lande is – se twee inmaakfabrieke kan sluit.” Die ander een is van die Rhodes Groep.
