Die nuwe regulasies geld van vandag.
Dr. Nkosazana Dlamini-Zuma, minister van samewerkende regering en tradisionele sake, het die nuwe regulasies in die Staatskoerant afgekondig. Hoewel daar nie in die regulasies duidelik aangedui word dat die verbod op sigarette opgehef is nie, word dit nie meer genoem in die lys van ekonomiese aktiwiteite wat uitgesluit word nie.
Dlamini-Zuma het ’n beroep gedoen dat rokers nie sigarette wat hulle rook, moet uitruil nie. Sy het ook gevra dat diegene wat alkohol gedrink het, nie moet bestuur nie.
Tabakorganisasies, die Fair Trade Independent Tobacco Association (Fita) en British American Tobacco in SA (Batsa) het, ten spyte van die opheffing van die verbod, aangedui dat hulle voortgaan met hul onderskeie hofgedinge aangesien die risiko altyd bestaan dat die regering die verbod weer kan instel. Dlamini-Zuma meen dat sigarette die risiko van Covid-19-besmettings verhoog en dat rokers druk plaas op Suid-Afrika se gesondheidstelsel.
Sy het tydens ’n mediakonferensie waar sy die vlak 2-regulasies bekend gemaak het, gesê dat die verbod op tabakprodukte ingestel is omdat dit die asemhalingstelsel aantas en dat daar bewyse van ander lande was dat rokers ernstiger siek kan word van Covid-19. Meer beddens en ventilators is dus in die hoësorgeenhede vir rokers nodig. “As jy ophou rook, sien jy vinnig resultate. Jou asemhalingstelsel en algemene gesondheid verbeter vinnig. Dit is waarom daar ’n tydelike verbod daarop was.”
Sy het gesê omdat genoeg beddens en ventilators nou in hospitale beskikbaar is as mense dit nodig kry, word sigaretverkope sonder beperkinge toegelaat.
Alkohol
Drank mag van Maandag tot Donderdag van 09:00 tot 17:00 verkoop word. Restaurante, tavernes en kroeë mag ook weer drank verkoop, maar mag dit nie ná 22:00 verkoop word nie en die ondernemings mag nie ná 22:00 verder besigheid doen nie. Toegang word tot 50 mense beperk.
Die aandklokreël van 22:00 tot 04:00 bly geldig. Die regering glo dat dit is veral nodig noudat drank weer verkoop mag word.
Dlamini-Zuma het gesê sekere beperkinge moes op die verkoop van alkohol geplaas word, want dit gee aanleiding tot bakleiery en dronkbestuur. Trauma-eenhede was leeg toe alkohol verbied was, maar traumagevalle het toegeneem toe dit vir weer toegelaat was. Daar is derhalwe besluit dat die beperkinge op die verkoop van drank stadig opgehef moet word.
Ander regulasies
Alle reisbeperkinge binne die land word ook opgehef, insluitend reise tussen provinsies. Buitelandse reise is steeds nie moontlik nie.
Plekke wat verblyf verskaf, word toegelaat om tot 50% van hul kapasiteit te vul.
Dit sal nou weer moontlik wees om familie en vriende te besoek, maar dit mag nie meer as tien mense op ’n keer wees nie.
Alle ander toelaatbare “samekomste” soos by rolprentteaters, konserte, vertonings, konferensies, vergaderings, begrafnisse, kerke en selfs troues mag nie meer as 50 mense wees nie. Dit geld ook oefenplekke en openbare swembaddens.
Toeskouers sal steeds nie by sportgeleenthede toegelaat word nie.
Nagklubs mag nie oopmaak nie, want dit is steeds op die lys van ekonomiese uitsluitings. Internasionale vlugte en skeepsreise vir ontspanning, asook internasionale sportgeleenthede is steeds uitgesluit.
Met die regulasies wat heelwat verslap is, het Dlamini-Zuma mense aangemoedig om gehoor te gee aan die veiligheidsmaatreëls soos die dra van maskers, die was van hande en die handhawing van afstand.
