Dr. Nkosazana Dlamini-Zuma, minister van samewerkende regering en tradisionele sake, het vroeër die nasionale ramptoestand, wat op 15 Augustus om middernag sou verstryk het, tot 15 September verleng.
Ramaphosa het benadruk dat mense groter sorg moet neem en seker maak dat hulle maskers dra, afstand handhaaf en ander veiligheidsregulasies toepas as hulle hul huise verlaat.
Die regering het in Julie ’n onmiddellike verbod op die verkoop en verspreiding van alkohol geplaas om te verhinder dat hospitale belas word met alkoholverwante beserings wat vermy kon word.
Vlak 2-regulasies
Die aandklokreël van 22:00 tot 04:00 bly geldig. Alkohol mag verkoop word van Maandag tot Donderdag van 09:00 tot 17:00. Restaurante, tavernes en kroeë mag weer drank verkoop, maar hulle mag nie ná 22:00 alkohol verkoop of sake doen nie.
Sanksies soos die opskort van die dranklisensies van drinkplekke wat nie aan die bepaling voldoen nie, moet volgens Ramaphosa oorweeg word.
Die opheffing van die verbod op die verkoop van tabakprodukte sal rokers ’n sug van verligting laat slaak. Sedert die begin van die inperking in Maart moes hulle op die swartmark tot ses keer die normale prys vir onwettige sigarette betaal.
Alle reisbeperkinge binne die land is opgehef, insluitend reise tussen provinsies. Buitelandse reise is steeds nie moontlik nie.
Plekke wat verblyf verskaf, word toegelaat om tot 50% van hul kapasiteit te vul.
Dit sal nou weer moontlik wees om familie en vriende te besoek.
Toeskouers sal steeds nie by sportgeleenthede toegelaat word nie.
