Mnr. Rico Basson, bestuurshoof van Vinpro, sê luidens ’n verklaring die wynbedryf is verlig dat die regering nie strenger inperkingsmaatreëls ingestel het nie aangesien dit tydens die feestyd ’n ernstige effek kon hê op wynkelders, wyntoerismebestemmings en die gesinne wat van dié bedryf afhanklik is.
“Dit blyk hierdeur dat die regering gehoor gee aan die bedryf se deurlopende versoeke vir risiko- en feitgebaseerde besluitneming rondom handelsbeperkings op drank.”
Wynkelders is veral gedurende die somermaande afhanklik van plaaslike en internasionale wyntoerisme om hul voortbestaan te verseker. Met die internasionale reisbeperkings wat weens die omikron-stam op Suid-Afrika toegepas is, het talle wynkelders feitlik oornag ’n groot deel van hul teikenmark vir die feestyd verloor.
Die reisbeperkings hou heelwat finansiële implikasies vir die wynbedryf in, maar die bedryf is dankbaar dat daar steeds plaaslik handel gedryf kan word. Binnelandse toerisme is veral ’n belangrike reddingsboei vir hierdie besighede.
Basson sê die regering moenie beperkings op drankhandel inspan om hospitaalkapasiteit te probeer skep nie, maar moet eerder die voortou neem om te verseker dat die gesondheidstelsel voorbereid is op die nuutste vlaag besmettings.
Hy doen ’n beroep op Suid-Afrikaners om by veiligheidsprotokolle te hou en dit by alle instellings noukeurig toe te pas. “Ons het nou die geleentheid om te wys dat ons kan saamstaan teen covid-19 om ons bedryf oop te hou.”
